呢嗱，往年煲呔曾如果唔離港避年，春節梗會去維園年宵市場扮吓嘢。不過佢尋日亦好似學人玩「創意」，唔去銅鑼灣，而係山長水遠入沙田。咦，佢啱啱至出咗個「動畫版」拜年新招，唔通想試吓自己係咪好似喺短片入面咁識得飛？原來佢入沙田係去源禾路年宵市場。佢買完慈善曲奇，又去望吓老虎公仔，跟手再買紮花送畀太太，仲搭埋香吻當情人節大禮添，不知幾咁風騷。

不過，原來傳媒尋日至接到當局通知，話煲呔曾會去沙田。唔知佢係咪驚有後生仔好似上次反高鐵包圍立法會咁去維園踩場，於是臨時改變主意。煲呔曾行完年宵市場見記者嗰陣，死口唔認驚畀人柴台，話因為維園已經去咗四年，今年想去其他市場湊吓熱鬧喎。

認又好，唔認又好，以煲呔曾嘅縮骨性格，失驚無神改變目的地梗有原因嘅。如果真係怕咗八十後而唔去維園，唔止誤解咗班後生仔，更加錯過一次同佢哋接觸溝通嘅好機會。

其實後生仔有乜好驚吖？如果煲呔曾多啲同八十後接觸，一定會改變睇法。佢哋並唔係一味搞搞震，有破壞冇建設，而係憑住爆棚嘅創意，成為今年年宵市場嘅大贏家。

呢嗱，香港大學有班同學從熱爆全城嘅「鏹水彈」話題睇到商機，設計咗一款「鏹水遮」。除咗個名緊貼熱門話題夠過癮之外，更因為「年年行年宵都會落雨」而大受歡迎，最旺嗰陣兩分鐘就賣咗超過十把。

樹仁大學同學仲巴閉，推出嘅「紙巾咕連紙巾套」唔止獲得知名品牌垂青，仲接埋定單添，熱賣程度講都冇人信，即使三次加價，照樣賣斷市，一早就封咗蝕本門，埋單計數大賺七萬蚊。

年宵市場十個八十後八個賺大錢，諗頭多多又肯落手落腳去做，係佢哋嘅必殺技。有研究創意嘅學者話，後生仔既掌握潮流脈搏，又關心時事，創意無可限量。

不過唔係個個都咁好彩㗎。嗱，嗰啲諗住靠諷刺煲呔曾嘅產品搵番一筆嘅檔攤就失晒預算嘞。因為冇乜人吼，就算獨家產品好似煲呔咕，都要靠減價促銷，幾乎連本都蝕埋。點解？正如有文化評論人話齋，煲呔曾已經「唔掂檔」，根本冇人想見到佢，想有得賺？難咯！

港府成日話要加強同八十後溝通，有高官仲開埋facebook想同佢哋做個Friend添。但係如果個個好似煲呔曾咁諗縮數，避得就避，後生仔又邊會畀面，點會睇你台戲吖？