之但係又咁喎，冇事冇幹就話我敬你一尺、你敬我一丈啫，假如有人浪費公帑，即係搵納稅人笨，咁就唔同講法嘞。生產力促進局前排受到審計署炮轟，批評佢哋管治混亂，使用公帑又亂七八糟，到咗尋日，立法會政府帳目委員會提交報告，踩多一腳表示極度遺憾及震驚。你話嘞，仲使唔使畀面先？所以咯喎，功夫茶決定，一於簡稱佢哋做牲畜……吖，唔係，生促局！

不如先回顧一下審計署點講。根據舊年十一月發表嘅審計報告，生促局喺○八至○九年度向員工發放四百九十萬元浮動薪酬，較前一個年度增加超過十倍，之但係，原來局方預測未來三年會累積虧損六千幾萬元。即係話，生促局喺明知蝕大本嘅情況之下仍然慷納稅人之慨，利用公帑明益自己友。

另外報告又發現，三名高層入職前已經領取政府或者資助機構嘅房屋津貼，入職後又向局方領取津貼。即係話，生促局容許高層享受雙重福利。

審計報告未數完o架，原來生促局係「超級失物大戶」，○五年發覺有八千七百二十六件物品不翼而飛，牽涉款項五千萬，○八年六月再有驚人發現，全部二千五百七十二部電腦之中，居然有一百零九部離奇失蹤。

好嘞，轉個頭睇睇立法會點講。政府帳目委員會嘅結論係，生促局作為一家接受政府資助嘅機構，使用公帑欠缺應有嘅負責文化及審慎態度，而且內部監控寬鬆又欠缺成效，帳委會對此感到極度遺憾及震驚。帳委會又對生促局未有妥善管理固定資產及設備感到震驚及強烈不滿，認為不可以接受。至於局方考慮員工薪酬是否與表現掛鈎，並無遵守相關法規及指引，招聘程序亦有不當，帳委會深表遺憾，認為不可接受。

唉，唔知大家覺唔覺，功夫茶就覺得香港嘅納稅人好可憐。年年交咁鬼死多稅，啱啱上個月又話要交稅，原來交完稅係畀人攞去享受雙重福利，係畀人攞去遺失八千幾件物品，基本上同掟落鹹水海冇乜分別。如果你認為風水佬打輸世紀爭產官司係反映「天地有正氣」，功夫茶贈你一句「正氣未夠照」，因為好多靠政府出糧嘅公營機構依然充滿邪氣。

招呼完生促局，輪到私隱專員公署。帳委會根據審計報告，批評私隱專員公署無法喺四十五日限期內向投訴人送達拒絕通知書，表示遺憾及深切關注，認為署方有法不依，可能損害公信力。

計功夫茶話齋，算吧啦，醜聞多多嘅私隱專員公署其實已經冇乜公信力，損來損去都係差唔多。總而言之，一個係咁，兩個係咁，公營機構邪鬥邪，睇怕真係要搵番個唔係神棍嘅天師捉一捉妖！