講真，你都咪話曾蔭權冇料到，賀年卡通短片簡簡單單一句「回家真好」之嘛，各路英雄阿貓阿狗紛紛響應。睇睇呢邊，一聲春雷嚇到離家出走嘅警犬奀豬返咗屋企咯。睇睇嗰邊，私隱專員吳斌宣布今年七月三十一日約滿之後不尋求續任，即係意興闌珊掛冠求去，回家真好。
吖，功夫茶突然之間諗起陶淵明嘅《歸去來辭》：「歸去來兮，田園將蕪胡不歸，既自以心為形役，奚惆悵而獨悲？悟已往之不諫，知來者之可追。實迷途其未遠，覺今是而昨非。」
陶淵明一句歸去來兮，煲呔曾一句回家真好，古今呼應，互相輝映，幾有詩情畫意呀。
咦咦咦，好似話特區政府出現政務官逃亡潮，一個二個辭官歸故里。睇怕回家真好嘅感染力確係非同凡響，人人放棄戀棧，個個不如歸去。係咪覺今是而昨非呢？好難講，功夫茶又唔係識得掘窿作法嘅生神仙，鬼知政務官因乜事幹歸去來兮啫。不過有一個現象值得探討，退休高官最鍾意一個屈尾十轉頭即刻入職私營機構搵真銀，呢個可能係部分原因啩。
講番吳斌嗰筆吖，原來呢個私隱專員幾好文采㗎，發表聲明句句有骨。佢話喎：「我覺得現在是引退的適當時刻，讓一位更年輕但難免在私隱規管方面有較少經驗的人接任私隱專員一職。」另外又講到，希望繼任人對保障私隱工作充滿熱誠，因為呢份工要求付出超乎一般公務員D5可得到嘅合理薪酬水平。
等功夫茶同大家解讀一下《吳斌版歸去來辭》，即係「驗骨」。首先，誇讚自己經驗豐富，繼任嘅後生仔女無可比擬。其次，埋怨自己薪酬太奀，高付出與低收入不成比例。
事實係咪咁呢？經驗豐富嘅私隱專員係咪好似含冤受屈嘅家嫂，一直受到家婆欺負，劈完柴都冇一餐飽飯食呢？不如咁講啦，劈柴劈得好就話應該有飯食啫，好可惜，審計署曾經猛烈批評私隱專員公署幾宗罪，包括浪費公帑大花筒，以及處理投訴個案效率奇差等等。你話嘞，失職家嫂何來有資格埋怨家婆待薄自己？
點都好啦，吳斌引退已成定局，有人辭官歸故里，有人漏夜趕科場，繼任專員會係邊個？頂頭上司政制及內地事務局話會公開遴選喎。計功夫茶話齋，遴唔遴選其實都冇乜所謂，反正歷任專員是非不絕，公署行政問題多多，做事甩甩漏漏之餘又擾民，仲未計多年以來不知浪費咗幾多納稅人嘅血汗錢。
不妨講得直截了當少少，吳專員不如歸去，私隱署不如摺埋，公署上下人等一律響應陶淵明暨曾蔭權嘅立體聲聯合呼籲，歸去來兮，回家真好！