活化工廈呢條橋噏咗好耐啦，舊年曾蔭權喺施政報告攞出嚟「翻叮」之後，突然又時髦起來。加上班高官乘機抽吓水，講到好似大有可為咁，往日冇人吼嘅工廈一下變咗搶手貨，跆拳道場、 舞蹈學校、酒店、骨灰龕，各適其適，應有盡有，工廈從未如此熱鬧過。

呢，有市民諗住大展拳腳，揼重本喺新界工廈經營野戰遊戲，嫌地方太細，連天台都做埋「戰場」，點知洗濕個頭至發現領嘢，投資隨時血本無歸，連個場都可能要執埋。

原來有啲地契規定，經營者唔係乜都做得，只可以將工廈用作工業或者貨倉用途，經營野戰場純粹係商業活動，唔可以喺呢類工廈做。地政總署亦證實，上述場地違反咗地契，當局仲話，如果情況未有改善，會採取跟進行動。

乜咁大整蠱吖？野戰場負責人話，當局宣傳活化工廈嗰陣，並冇詳細解釋工廈有乜嘢限制，佢仲以為實掂。家陣生米已經煮成熟飯，錢揼咗落去當局至話有問題，令經營者無所適從。有立法會議員批評，活化工廈只係抽象嘅概念，當局提咗出來又冇實際指引，好易令人違例，直頭就係「活化變死化」！

好明顯，因為港府當初冇講清講楚，令經營者對有關限制矇查查，至會搞成咁。其實，唔只市民無所適從，政府高官本身對點樣活化工廈，一樣係心中無數。

嗱，舊年施政報告建議活化工廈，食衞局局長周一嶽叻唔切，即刻話要研究將空置工廈改為骨灰龕堂，結果畀人炳到七彩。佢未諮詢過地政總署，又一廂情願咁提出要倣效日本，研究設立骨灰龕自願性登記制度；點知發展局局長林鄭月娥就唱反調，話暫時只會保持現狀，以免引起地區人士強烈反對。

你話嘞，兩個問責高官一人講一套，完全唔夾嘴形，叫市民聽邊個先？咁搞法，活化工廈計劃有乜辦法唔亂過亂世佳人吖？除咗經營項目五花八門、千奇百怪之外，近排好多業主更趁機瘋狂加租，好多租戶未見其利，先受其害，咁嘅活化，簡直靠害就真。

聽講活化舊工廈嘅新措施就快推出嘞，鬍鬚曾又叻唔切，話要起「牽頭作用」，考慮將部分政府部門搬去工廠大廈辦公喎。咪話功夫茶唔提醒你哋班高官，千祈要搞清楚份地契有乜限制，否則，如果再神神化化，連自己都變咗「違例經營」，焗住要搬番出嚟「打野戰」，咁就真係國際大笑話喇。