花旗銀行委託城市大學做咗一項調查，去年本港擁有流動資產一百萬港元以上嘅人增加百分之十三，人數高達三十九萬四千人，財富主要同投資回報獲利有關。百萬富翁最密集嘅地區係港島，平均每七個人就有一個身家過百萬。百萬富翁之中，退休人士比率最高，佔百分之二十八，其次係家庭主婦，有近兩成，甚至多過專業人士。平均每個百萬富翁擁有流動資產三百八十萬元，按年上升百分之十二。

功夫茶有啲啲咁多多莫名其妙，家庭主婦點解會有咁多錢嘅呢？傳統好男人就話會將每個月嘅收入「上繳中央」全數交晒畀老婆大人啫，之但係，成日都話好男人死晒，壞男人當道，蠱惑港男點會咁順攤做乖仔呀？定係家庭主婦個個都係秒秒鐘幾千萬上落嘅師奶股神？諗諗下，家庭主婦百萬富婆係一個好值得探討嘅課題，適合學者專家深入研究，順便睇睇點解百萬富婆咁容易受騙於寶藥黨爛到唔爛嘅陳腔濫調。

百萬富翁多咗一成三，固然係好事，功夫茶絕對唔鼓勵憎人富貴厭人貧，有錢係冇罪嘅，除非一夜暴發嘅途徑係掘窿作法淘古井。之不過咁，雖然香港有接近四十萬有錢人啫，窮等人家數目更加陣容鼎盛喎，為數百萬草根階層日日捱生捱死，橫睇掂睇，呢個又係貧富懸殊嘅社會現象，咁就唔係幾好嘞。

你知啦，香港本來已經係全世界貧富懸殊最嚴重嘅地方，家陣百萬富翁人數更上一層樓，即係話問題進一步惡化。

嗱嗱嗱，先旨聲明，真係唔做得憎人富貴厭人貧㗎，不過功夫茶冇辦法唔指出，百萬富翁其實包括特區政府一眾司長局長副局長，而呢一班個個年薪幾百萬嘅達官貴人，理論上係要幫助普羅大眾消滅貧窮嘅。尤其係財政司司長曾俊華，如果呢個百萬富翁唔去扶貧，全香港搵唔到第二個人有咁嘅本事。即係咁，假如有人憎到鬍鬚曾死死下，恨不得一口吞佢落肚再經過消化系統排出體外沖落廁所，理由應該同佢嘅私人財富無關，而係關於特區政府缺乏扶貧政策。

講到呢度，等功夫茶清一清喉嚨先，因為有一件好緊要嘅事要宣布，咳咳……咳咳……今日係二月二十四日星期三，適逢曾俊華發表財政預算案嘅大喜日子，好緊要嘅事就係，聽住嘞財爺，如果預算案仍然冇扶貧政策，全香港窮到褲穿窿嘅百萬大軍將會由頭憎到你落腳趾尾！

點都好啦，身家百萬做富翁，可憐窮人褲穿窿，政府官員既然咁多百萬富翁，當係公事公辦又好，當係行善積德都好，救救窮人啦，唔該！