副學位學額大幅膨脹，由十年前嘅二千幾個，急速劇增至現時超過三萬個，究竟係好事定係壞事？理論上咯喎，人人有書讀係好事，正如內地嘅希望工程，目的都係避免適齡學童冇書讀啫。之不過問題係，副學位學額大幅膨脹造成一個唔係咁健康嘅現象，部分競爭力較弱嘅院校取錄成績較差嘅學生，結果係學生質素一蟹不如一蟹。
打個譬喻吖，假如你係科科零雞蛋嘅學生，走投無路之下報讀外國野雞大學，然後你透過交學費而成功畢業，試問你會唔會係一個出色嘅畢業生？即使你揸住畢業證書唔知點解又搵到工作，你會唔會係一個出色嘅僱員？梗係唔會啦，你好可能係一個呃飯食嘅冗員。
提供副學位課程嘅院校當然唔係野雞大學啦，不過學額氾濫始終唔係好事。呢，由教育局委託嘅二○一○年副學位畢業生工作表現僱主意見調查發現，受訪僱主對畢業生整體表現嘅評分只係三點三五分，創咗十年新低，當中以英語能力、對時事商貿知識及自信心，以及解難能力表現最差。
如果將今年同上次○六年副學位畢業生調查比較，除咗「工作所需的專業技術」評分提升之外，其餘七個範疇評分全部報跌。其中英語能力調查，有一成六受訪僱主認為，副學士畢業生偶然或經常低於僱主要求，只有百分之三認為經常高於僱主要求。
簡單咁講，副學位畢業生存在三大弊病，水平不斷跌，英文不達標，僱主不滿意。正如有人話齋，副學位畢業生良莠不齊，語文能力非常參差，有啲仲差過未讀之前，可能冇咗公開試壓力，同埋技術性學科唔着重語文培訓有關。
好嘞，功夫茶問問大家，副學位學額點解會氾濫嘅呢？咪就係特區政府搞嘅「教育八萬五政策」累死囉，好大喜功嘅官老爺話喎，香港大專入學率要有六成。雖然有個咁偉大嘅目標，可惜港產官僚眼高手低，香港嘅大學學位有限，專上教育冇可能實現六成大專生嘅春秋大夢，所以港產官僚靈機一動，不如邯鄲學步開設副學位吖！
何謂副學位呢？講得好聽係高過中學，講得難聽係低過大學，理論上可以銜接大學，不過成功率相當低。學生哥交咗一大筆學費，浪費幾年光陰，孭到一身債之後，隨時得物無所用，因為高不成低不就而吊吊揈。
如果教育官僚真係有心作育英才，好心就積極提高副學位水準啦，最緊要嘅係提高大學銜接率，唔好等佢哋半途出家，受到職場老闆劣評如潮吖嘛！