貪曾雖然落台，繼續遺禍香江，身為港人同胞真係好鬼死悲哀㗎。你知啦，添馬艦新政府總部以及立法會大樓係香港嘅象徵性建築物吖嘛，否則早前都唔會有荷里活巨片《變形金剛4》嘅大導演選擇來港拍攝啦，仲要喺「門常開」一帶拍攝爆炸場面，可惜造價五十四億元嘅政府總部居然淪為豆腐渣工程，你話係咪羞家吖？
添馬艦建築群之所以搞到甩皮甩骨，罪魁禍首就係好大喜功嘅前特首曾蔭權爵士，一心希望喺自己任期完結之前入伙攞威，所以夾硬催逼工程人員日夜趕工，卒之趕出一個丟人現眼嘅大頭佛。審計報告指出，前年十一月政總大樓移交程序大致完成嘅時候，仲有接近九萬項缺漏未完成，去到今年四月即係大樓竣工兩年之後，被揭發嘅缺漏更加增至十六萬三千多項，直至今年八月仍然未完全修妥。
「東方報業民意調查」結果顯示，四成二受訪者不滿政總施工質素差劣；三成三認為豆腐渣工程淪為國際笑話；兩成二憂慮日後要用公帑修補甩漏。
施工質素差劣唔單止導致形象受損，更加有害健康。食水供應設施使用率低係退伍軍人病菌繁殖嘅原因之一，審計署發現，政府總部三十五個附設淋浴設施嘅高官私人洗手間有四成並非經常使用。於是乎咯喎，政府總部開張不久之後，當時嘅教育局局長孫明揚證實染上退伍軍人症。
對於呢一個惡菌感染官員嘅現象，四成一受訪者擔心只係冰山一角，問題陸續有來；三成覺得後遺症禍及官員及公務員團隊；兩成五認為會影響工作效率。
新政總標榜環保，不過部分節能設備昂貴到嘔，要一百七十六年先至能夠回本，關於呢家嘢受訪者又點睇呢？四成五認為公帑用不得其所；兩成七覺得成本效益存疑；兩成六批評新政總表面環保，華而不實。
講到好大喜功，不得不提貪曾提出嘅十大基建至少有一半超支，超支總額一千零四十億元。唔使審啦，受訪者一定有意見，三成七擔心公帑填氹如無底深潭；三成五狠斥曾蔭權計算草率，要納稅人埋單；兩成五形容貪曾好大喜功。
唔好怪功夫茶有一份矢志不移嘅堅持，實在有必要再次促請廉政公署盡快為調查貪曾作出一個了斷，唔好再左拖右拖曠日持久。喂，對貪曾依法辦事一來符合香港嘅法治精神，二來咯喎，既然甩甩漏漏嘅政府總部有必要執漏，咁又點少得執一執貪曾呢一個罪魁禍首呢？即係咁，收拾貪曾算得上係「門常開」嘅其中一項執漏工程！