「千呼萬喚始出來，猶抱琵琶半遮面。」呢兩句唐詩係描述歌女出場時嗰種羞人答答嘅表情，其實亦可以用嚟形容港府新空氣指標登場o架。嗱，舊指標二十年如一日早就不合時宜，新指標千呼萬喚始出來，而且仲係半遮面嗰種，你話係咪慢咗幾拍吖？
係咁嘅，環保署宣布今月底推出全新「空氣質素健康指數」，取代現時嘅「空氣污染指數」。顧名思義，新指數以健康風險為本，將空氣質素定為十一級，以最近三小時四種污染物含量作評估，如果惡劣程度達到七級或以上，市民就應減少戶外逗留時間，減低被迫做人肉吸塵機嘅風險。新指數係咪可以保障市民健康仲未知，不過港產官僚就先保障自己，話新指數尺度比之前嚴謹，估計將來健康風險級別出現甚高或嚴重水平嘅日子會比以前多，強調咁唔代表空氣質素轉差喎。
簡直廢話，香港空氣質素每況愈下，係有目共睹嘅事實，唔使睇新指標都知喇。即係咁，遲到好過冇到，空氣污染日趨嚴重，治污除毒刻不容緩，有新指數點都比繼續用舊指數好，尤其現時沿用緊嘅空氣污染指數已經係二十年前嘅古老產物，標準寬鬆，形同虛設，最大價值唔係保障市民健康，而係為當局治污不力遮醜，早就應該掉落垃圾桶喇。市民依家最關心嘅問題係，新指數就有嘞，但究竟有冇新措施呢？正如扶貧一樣，如果只係推出一條貧窮線，而冇具體扶貧措施及目標，盞嘥氣嘅咋！
講到治污措施，港府就羞家咯。咁多年嚟，當局改善空氣質素可謂乏善足陳，唔係一味做騷，就係虎頭蛇尾，香港想唔變毒氣室都難。功夫茶想問港產官僚，有冇下定決心全力治污吖？有冇全新措施改善空氣質素吖？有冇周詳計劃減少廢氣排放吖？如果冇嘅話，唔使睇新指標，空氣污染爆燈嘅日子肯定長爆長有喇。
空氣污染殺人於無形，唔係講笑o架。世衞警告，空氣污染可以致癌，淨係二○一○年咋，全球因而造成肺癌死亡嘅受害者達二十二萬三千人；而本地研究亦指出，香港過去七年來，估計空氣污染造成逾七千人提前死亡，你都咪話唔得人驚。當然啦，空氣污染除咗損害健康，亦損害經濟。呢，內地長治久污，家陣唔止北京等華北地區沙塵滾滾，成個神州大地都煙霧迷蒙。就以近日嚟講，上海等華東城市成為重災區，空氣污染指數超過五百，搞到工業限產停產，三成巴士停駛，如果香港步其後塵，到時就算唔佔領中環，都七國咁亂喇。
一句講晒，姍姍來遲新指標，空氣污染何時了。港產官僚為人為己，快快全力治污，唔好再學前特首曾蔭權爵士做「氣候逃犯」喇！