一年一度又聖誕，每逢聖誕佳節例必人頭湧湧，唔係本地同胞出外散心，就係外地人士來港玩樂，出入境口岸一定People Mountain People Sea。入境處估計，今年聖誕及元旦假期將有一千一百一十一萬旅客人次經各海陸空管制站進出香港，較去年同期增加約百分之七點六，單係上周六各口岸已有近一百萬人次出入境。
非洲嘅動物大遷徙就話唔使辦手續自出自入啫，人類嘅節日大挪移必須出示證明文件，左搞搞，右搞搞，搞一輪先至能夠出出入入，若然負責處理相關事宜嘅政府部門人手不足，將會出現乜嘢情況呢？諗起都覺得恐怖，情況可能歷史倒流幾十年，好似功夫茶細細個掹衫尾喺羅湖過關返鄉下，呆等大半日都唔肯定幾時到終點。
好衰唔衰香港嘅紀律部隊變得愈來愈冇紀律可言，繼不久前入境處人員玩嘢，集體請假導致深圳灣口岸逼爆人潮之後，駐守機場嘅海關人員又有樣學樣，居然發動一場猶如「兵變」嘅集體請假！
據了解，兵變事件發生於十二月十五日下午，駐守機場嘅海關航空旅客及停機坪課，原本應該由四隊人員負責搜查旅客行李，當值分三更，每更三十人，包括十二名沙展，不過當日下午竟然只有五名沙展當值，其餘七人不約而同處於休假狀態，人手一時之間少咗四分之一。
點解咁巧合有超過一半以上嘅沙展不在工作崗位？簡單咁講啦，海關前線人員懷疑不滿新上任嘅管理層不顧人手緊絀，照樣增加前線人員嘅工作量，所以透過集體請假嘅方式表達訴求，若然管理層再唔正視問題，不排除會喺聖誕節同元旦日等等出入境高峰期再次發起行動。
你知啦，海關最重要嘅任務係阻截違禁物品流入香港，若然海關人手少咗，會唔會益咗販毒集團o架？就算冇益咗販毒集團，只係搜查旅客行李嘅效率低咗，咁都會拖慢出入境速度啦。海關關員工會主席陳明係咁講嘅，事件不了解，所以不置評，不過海關各科人手短缺，如果管理層繼續不正視，或者有更多唔同崗位嘅同袍，用唔同嘅方法表達不滿。
講來講去，紀律部隊不紀律嘅核心矛盾係人手短缺，有人唔想做到手忙腳亂一頭煙，所以就集體玩請假敦促上司解決問題。假如功夫茶係紀律部隊大管家，一定會徹底查一查究竟發生乜嘢事，然後對症下藥，勒令管理層同下屬好好溝通，絕對唔能夠妨礙旅客出入境，更加唔容許違禁物品自由行。萬一海關管理層真係冥頑不靈呢？送佢一句「聖誕快落」，降職燉冬菇！