救人救火，爭分奪秒，呢個道理係人都知，消防處又知唔知呢？本來冇理由唔知嘅，佢哋嘅職責就係救急扶危，點會唔知爭分奪秒嘅重要性吖。之不過咁，知係一回事，做係另一回事，消防處除咗有廢柴官僚，仲有一個廢過廢柴嘅第三代調派系統，搞到頻頻故障，跪低多過食飯，認真靠害。
呢，話口未完又出事喇。消防處嘅所謂第三代調派系統尋日又跪低接近三粒鐘，而且仲係早上繁忙時間，控制室焗住改用手提電話及無線電派車，結果七國咁亂，狼狽不堪，要額外抽調人手到總部支援。試諗吓，萬一呢段時間出面發生重大突發事故，會有咩後果呢？
唔係講笑o架，有病人家屬投訴，尋日早上致電九九九召喚救護車送病人到醫院，點知足足等咗一小時，救護車先至姍姍來遲，而且仲係跨區嘅救護車添。消防處嘅服務承諾係，九成半救護車召喚可於十二分鐘內到場，而今次所需時間竟然係服務承諾嘅五倍，急驚風遇着慢郎中，問你怕未。好彩呢位病人嘅情況唔算嚴重咋，否則，唔知消防處又點樣孭鑊。
講開又講，消防處烏龍百出，醜聞多多，呢啲蝦碌場面早就唔係乜嘢新聞，大家見怪不怪咯。有前線消防人員踢爆，耗資七億元公帑引入嘅第三代調派系統，自○五年投入服務以來，幾乎每月都有故障，正式係三日打魚，兩日曬網。話就話係第三代，其實已經係十幾年前嘅古老設計，性能仲差過一部智能手機，根本負荷唔到目前嘅實際需要，唔怪得頻頻跪低。今時今日，科技日新月異，消防處古老當時興，唔出事至奇喇。
有人要求消防處將調派系統升級至第四代，增強系統穩定性，以免妨礙救火及救援服務。計功夫茶話齋，升級換代固然有需要，但如果消防官僚唔與時並進，改善管理，就算調派系統升級至第四代甚至第五代，一樣會出事嘅咋。嗱，有人曾經為消防處總結出幾宗罪，包括調派混亂延誤救援、縱容員工違規不斷、逢迎成風不務正業等等，可見消防處管理混亂，即使有最好嘅設備，都係嘥氣嘅咋。
講到底，人嘅因素第一，調派系統烏龍百出仲係小兒科，消防處廢官為患先至係最大問題。以前嘅消防處形象正面，廣受市民歡迎，但近年每況愈下，負面新聞不絕，令人失去信心，究竟係咩原因？咪就係因為管理混亂囉。消防官僚不務正業，本身有咁多問題唔去解決，香港有咁多消防隱患唔去清除，反而寧願充當政治打手，肆意滋擾傳媒，打壓新聞自由，簡直係倒行逆施！