舉頭三尺未必有神明，仰首三丈肯定有招牌，鬼叫香港嘅特色之一就係霓虹燈光璀璨，而發出耀目光芒嘅正正係無處不在嘅招牌。之不過咁，招牌一多，危險亦多，事關日久失修嘅後果好嚴重o架，冇耐之前旺角彌敦道先至上演一幕殘舊招牌吊吊揈嘅驚險劇目，搞到警方消防大陣仗封路搶救。
既然有潛在危險嘅招牌咁多，係咪應該盡快清拆呢？理論上當然應該啦，而且實際上早於○九年，當時仍未被揭發貪腐醜聞纏身嘅前特首曾蔭權爵士，已經承諾展開大型清拆招牌行動，優先清拆鬧市五千個違例招牌。屋宇署公布全港棄置招牌約有二萬個，將每年招牌清拆嘅目標增至一千六百個，聘請二十多人組成特別隊伍處理。
好嘞，目標定咗，進度如何？開頭係威係勢o架，屋宇署○九年拆咗六千四百幾個招牌，不過跟住就虎頭蛇尾，舊年大幅減少至一千三百幾個，同期發出嘅清拆令亦由五千五百幾張，急降至二百六十幾張，劇減九成半呀衰鬼！
更加衰鬼嘅係，屋宇署好學唔學，學人玩造數喎。即係咁，屋宇署每年嘅管制人員報告之中，一直將清拆招牌嘅目標維持於一千二百個，數字低於政府公開承諾嘅清拆目標，包括發展局前局長林鄭月娥一○年及一一年所講嘅二千四百個同一千六百個，以及屋宇署○九年承諾嘅一千六百個。於是乎咯喎，即使屋宇署舊年只係清拆一千三百幾個招牌，表面上超標完成工作，其實係玩弄數字遊戲。
屋宇署玩造數係師承何處嘅呢？計功夫茶話齋，消防處肯定係其中一個「技偽高強」嘅師傅。審計署報告指出，消防處處理安全投訴出現大量延誤個案，截至今年七月十五日為止，仍然有一千五百二十五宗投訴未處理完成，其中有一百五十七宗更加超過三百六十日之前已經收到，而處方未有就延誤原因記錄在案。明明係大量延誤，消防處居然夠膽死聲稱「處理消防安全投訴百分百達標」，你話係咪呃鬼食豆腐吖！
屋宇署推行強制驗樓同驗窗工作不達標，家陣拆招牌又玩造數，算唔算係自拆招牌呢？講真吖，莫講話屋宇署招牌不保，但凡政府部門嘅服務承諾爛尾收場，都會產生自拆招牌嘅後果。大家睇下廉政專員公署吖，服務承諾明明係肅貪倡廉，點不知前專員湯顯明帶頭摧毀廉潔奉公嘅核心價值，立法會政府帳目委員會發表報告予以譴責。貪湯唔止親手拆咗廉署招牌，連香港嘅法治招牌都岌岌可危呀！