香港地少車多，違例泊車係一個老大難嘅問題，港府一直束手無策，依家先至話要改善喎，究竟有乜計仔呢？唉，嚟嚟去去咪又係向錢看！
違例泊車有幾嚴重？嗱，今年首十個月就有超過八十六萬宗，按年增加一成三，都咪話唔犀利。警方歸咎於俗稱「牛肉乾」嘅三百二十元定額罰款阻嚇力唔夠，所以計劃加辣提高罰額喎。至於罰款提高幾多，聽講仲未有定案，可能參考衝紅燈或胡亂切線等嘅罰款水平，加至四百五十元，亦可能加碼一倍，提高至六百至七百元添，問你怕未。
即係咁，違泊問題愈嚟愈嚴重，搞到交通阻塞，人車爭路，險象環生，提高罰款增加阻嚇性，係無可厚非嘅。正如汽車業人士話齋，只要加幅合理，唔係倍增罰款，係可以接受嘅。不過咁，提高罰款係咪就可以解決問題呢？梗唔係喇，業界指出，近年汽車數量節節上升，平均每年增加百分之二至三，但停車位卻唔見增加，本來已經僧多粥少嘅喇，依家咪雪上加霜囉。除非官老爺發明出叮噹百寶「神奇縮細槍」，駕駛者可以將部車縮細袋走啦，如果唔係，就算增加幾多罰款，一樣有人違泊嘅咋！
再講喇，就算有泊位，司機亦經常要焗住周街亂泊。運輸業投訴，往往有司機生人霸死地，唔入咪錶照泊車，而警方就隻眼開隻眼閉，懶得執法，加劇其他司機違泊嘅問題。
講到呢度，等功夫茶做個小結。違泊問題日趨嚴重，關鍵唔係罰款唔夠阻嚇性，而係當局唔夠積極性。明知泊位供不應求，居然翹埋雙手，唔去諗計增加供應；明知有司機生人霸死地，居然瞌埋雙眼，唔去執法掃蕩路霸。正所謂，泊車要入錢，出糧要交貨，港產官僚只識收錢，唔識做嘢，佢哋至係違泊亂象嘅禍源囉。
講開交通亂象，其實點止違例泊車吖。呢，西九龍走廊尋日發生駭人聽聞嘅「甩轆」車禍，一輛重型貨車行駛期間突然車胎飛脫，好似炮彈飛車咁，造成至少七名途人受傷，其中多人身受重創。道路安全關乎人命，甩轆炮彈咁恐怖嘅事情都可以發生，可想而知當局嘅監管係幾咁兒戲。
功夫茶再次提醒官老爺，馬路如虎口，交通安全絕對唔可以馬虎o架。違泊亂象的確需要改善，牛肉乾的確需要加辣，不過咁，加辣嘅同時，唔該你哋亦要加多兩錢肉緊，做好自己份工，既要增加泊位，亦要勤於執法。大家都知啦，北大人家陣一聽到「佔領中環」就神經繃緊，萬一有日中環畀違泊車輛全面佔領，港產官僚隨時唔止收牛肉乾，仲可能畀人停牌o架！