隨着訪港旅客愈來愈多，旅遊糾紛亦不斷增加，其中部分固然緣於香港不良業者劏客欺客，但亦有部分係旅客無理取鬧造成。呢，尋日又有旅霸大鬧香江，簡直令人嘆為觀止。
件事係咁嘅。一批內地旅客參加香港和台灣九日遊，部分人因為簽證問題去唔到台灣，前晚起滯留香港，除咗報警求助，並喺落馬洲管制站通宵抗議，要求賠償，其後大部分旅客接受旅行社賠償五千元另加機票，返回內地，但依然有部分人拒絕接受，堅持要賠五萬元或十倍團費，否則「死在這兒都不走」，甚至要去政府總部集會抗議咁話。結果擾攘超過廿四小時都未解決，唔止驚動本地相關部門，旅遊業議會介入調停，連國家旅遊局都派人落嚟了解事件。
冤有頭，債有主，成件事係因為部分旅客被台灣列入黑名單而簽唔到證，首先係旅客嘅「身份」有問題，其次係內地旅行社嘅責任，關香港乜事呢？再講吖，旅客分別畀咗二千至六千元旅費，家陣可以攞番五千元賠償同機票，雖然無緣去寶島，但變相免費遊香港，除笨有精，咁都仲唔滿足，仲要撒野發爛渣，已經唔係無理取鬧咁簡單，而係變相勒索！
正如有人話齋，如果旅客真係咁夠膽，使乜欺善怕惡包圍香港政府吖，索性踩上天安門，包圍中南海吖，笨！
講開又講，香港已經唔係第一次發生旅霸事件嘅啦。早前五一黃金周發生「黃金客來港掘金」事件，旅行社息事寧人，賠錢了事，功夫茶當時已經預言，此例一開，後患無窮，果然不幸而言中。
有業者明言，近年香港旅遊業糾紛愈來愈多，當中大部分都唔關香港事，只係因為內地法治不彰，令香港成為抗爭之地，受害旅客知道返內地後追索無門，所以故意喺香港發難，拉香港落水，搞到本港旅遊業形象受損，根本就係無妄之災。
即係咁，凡事都要合情合理合法，處理旅遊糾紛都係一樣，如果香港唔啱，當然要承擔要改善，但反過來講，如果錯不在香港，旅遊業者就應該據理力爭，否則旅霸得寸進尺，得隴望蜀，有樣學樣，咁仲成世界嘅。
當然，香港每年接待幾千萬內地旅客，大部分都係循規蹈矩講道理嘅，只可惜一粒老鼠屎搞壞一鍋粥，旅霸雖然唔多，但影響惡劣，唔只破壞內地人形象，引起港人反感，仲搞到中港矛盾火上添油，簡直豈有此理！
今次事件再次提醒業界，旅霸之風不可長，絕對唔可以姑息養奸。你愈係息事寧人，佢就愈有恃無恐，愈無理取鬧，香港遲早畀人玩殘。