本地權貴階級有一個共通點，唔係英明神武，而係知法犯法。好似前特首曾蔭權以及前政務司司長唐英年咁吖，名下物業都有違規僭建，唐唐尊夫人郭妤淺最近先至被法官大人裁定僭建罪名成立，罰款十二萬元。雖然對於富豪家族而言十二萬元簡直濕濕碎，少飲一支「（手拿）肺」紅酒已經全數抵銷，不過始終叫做受到法律制裁。
其他權貴階級嘅僭建例子不勝枚舉，既然咁多名門望族同新界鄉紳被揭發有法不依，屋宇署應該加強巡查、加強執法以及加強懲治至係，事實到底係點呢？不如睇睇數字先喇。
根據屋宇署資料，舉報僭建個案由○九年二萬五千多宗，急升至去年四萬四千多宗，而同期發出嘅清拆令由三萬一千多張，減至一萬二千多張。至於糾正或拆除僭建物個案，由○九年嘅四萬二千多宗，跌至去年嘅一萬三千多宗，由一○年起連續三年不達標，僅僅完成目標嘅四成五至五成九，搞到五萬八千多宗清拆令仲未執行，問你服未。
若然唔係僭建，只係樓宇失修，情況又如何呀？過去三年屋宇署每年接獲超過一萬三千宗舉報，不過已修葺樓宇數目由○九年超過一千幢，銳減至去年不足七百五十幢，同樣係連續三年不達標，只完成五成九至七成八。
功夫茶仲記得唐唐當日嘅金句，違規就係違規，僭建就係僭建，所以佢後來都好無奈咁將唐氏大宅嘅地下王宮填氹還原。問題係，香港仲有幾多人好似唐唐咁目無法紀，至今依然逍遙法外嘅呢？屋宇署處理僭建物同樓宇失修嘅進度慢過烏龜，試問又點樣能夠撥亂反正？喂喂喂，僭建同樓宇失修潛在好大風險o架，就好似計時炸彈咁，萬一唔好彩有舊石屎跌落街，無辜辜扑死路人甲乙丙點算好呀？
今年十月喎，過百名屋宇署前線人員曾經發起大罷工，抗議部門自一一年改組後削減大量合約員工，導致人手不足，工作嚴重積壓，處理僭建物同失修樓宇進度落後。正如佢哋話齋，屋宇署改組後將招牌、漏水及劏房等等工作整合，加上新增強制驗窗項目，令人手被分薄，撇除專責處理消防問題人員，前線只有百幾人處理舊樓。簡單咁講，新增工作多咗，前線人手唔夠，七個蓋冚唔到十個煲，想唔出事都幾難。
大家都知道僭建及樓宇失修係幾咁危險o架啦，最慘痛例子莫過於土瓜灣馬頭圍道冧樓死人。計功夫茶話齋，屋宇署增聘人手刻不容緩，人命關天不容怠忽職守，港產官僚都唔想見到市民出街要行騎樓底戴鋼盔！