大家記唔記得，財政司司長曾俊華曾經被商界精英形容為「大罪人」？呢一個商界精英來頭唔小o架，佢就係身兼梁營猛將嘅恒隆集團恒隆地產董事長陳啟宗，之所以有咁嘅批評，原因係鬍鬚曾未能做到「應使則使」嘅理財原則。
你知啦，財政司司長作為特區政府嘅大掌櫃，有效運用財技係好重要o架。情況就好比相夫教子嘅C9，持家有道就能夠家和萬事興，持家無道咯喎，家衰口不停囉。照咁講，曾俊華似乎冇企圖擺脫大罪人嘅標籤，繼續做佢持家無道嘅官場C9。
點解咁講呢？大家睇下立法會財經事務委員會嘅開會情況吖，議員就財政預算案發表意見，不少議員認為政府審慎有餘，進取不足，財政預算經常高估開支，低估收入，對於房屋及福利事宜欠缺長遠規劃。至於富貴黨嘅田北俊，更加老實不客氣批評政府實際上係「孤寒財主」，搬弄數字繼續理財保守。田北俊認為，《基本法》要求政府量入為出，唔係有入不出，希望政府多花錢幫助弱勢社群，令社會更和諧。
嗱嗱嗱，即係咁，假如一個C9界事頭婆捉襟見肘，巧婦難為無米炊，冇錢糴米就話有必要死慳死抵啫，不過若然手頭鬆動甚至錢多到毋須憂柴憂米，死慳死抵馬上變成多餘到極，甚至有虐待老公仔女之嫌。試問，特區政府係冇錢糴米吖，定係手頭鬆動？答案顯而易見，庫房彈藥充足，曾俊華根本冇必要做一個孤寒成性嘅財政司C9。
冇耐之前安永會計師事務所預測，本年度政府會由原本估計出現輕微赤字變成轉虧為盈，將會錄得一百二十億元盈餘，令截至明年三月底嘅財政儲備增至七千四百五十九億元。於是安永建議，寬免部分薪俸稅、擴闊稅階以及增加多項免稅額。
對於理財保守嘅指摘，鬍鬚曾例牌擰頭擰髻矢口否認，佢話喎，任內政府開支已經增加超過一倍，又話任何長遠福利政策都涉及恒常開支，必須小心考慮將來對公共財政造成嘅負擔。開支增加超過一倍係唔係等於「應使則使」呢？當然唔係啦，慳妹以前用五蚊買菜頭菜尾落鑊，即使變咗用十蚊買餸，都唔等於屋企人有三餐安樂茶飯。
學似另一位議員話齋，之前政府講過增建九間醫院，至今仍未見有任何具體撥款及開支計劃。好明顯啦，孤寒財主應使不使。
如果功夫茶係掌管幾千億元財政儲備嘅財政司司長，肯定第一時間開倉扶貧，千方百計紓緩貧富懸殊，事關老百姓一旦冇飯開，隨時集結成一股摧枯拉朽嘅反政府力量o架！