為人為到底，送佛送到西，呢家嘢係中國人嘅傳統美德，做好人唔應該半途而廢。最近有一個毛公仔「路姆西」大受歡迎，假如好人好姐為德不卒，唔將一路向西嘅佛老爺送到西，話唔定對方一怒之下會向你丟出一個路姆西。
呢嗱嗱嗱，負責管理大量公屋商場及停車場嘅領匯曾經扮過做好人，忽然之間又為德不卒喎，若然閣下手頭上真係有幾個路姆西想丟下，不妨考慮丟向領匯。
先講講領匯點樣扮好人啦，呢一間上市公司從○九年四月開始，向接載四肢嚴重殘障親屬嘅駕駛人士提供半價泊車優惠，合資格嘅受惠者大概二百人。領匯當時好自豪o架，懶巴閉咁話係「全港首個機構為傷健人士親屬提供泊車優惠」。冇錯，大家可能覺得受惠者只有二百人唔算多，半價泊車優惠亦只係小恩小惠，但係點都叫做好過冇，畢竟領匯實在太過惡名昭彰嘞，旗下商舖不斷加租加租再加租，優惠一下傷健人士親屬算係「獲大大利回小小吐」。
令人感到百般無奈嘅係，領匯為人唔係為到底，送佛並非送到西，佢哋忽然通知停車場顧客，今年九月底不再接受有關優惠嘅新申請，正在使用嘅顧客明年三月亦會終止優惠。
講到呢度，功夫茶提提大家，領匯剛剛公布中期業績，半年收益係三十五億元，賺錢賺到盆滿缽滿。對於一間盈利咁豐厚嘅公司而言，向接載四肢嚴重殘障親屬嘅駕駛人士提供半價泊車優惠，簡直係微不足道嘅小菜一碟啦，點解都要咁縮骨呢？大概又係三個字作怪：賺到盡。
賺到盡確實係領匯「擇賤固執」嘅金科玉律，其他公屋商場起勢加租唔講嘞，淨係睇睇赤柱廣場發生乜嘢事吖。赤柱廣場於千禧年落成，同其他無數公屋商場一樣，原意係為咗馬坑邨居民提供日常生活所需，○五年房屋署將轄下商場物業出售之後，赤柱廣場就轉由領匯管理。為咗吸引更多遊客，領匯於一○年為廣場進行資產提升工程，大肆翻新引入高級食肆，貨品類型主攻外來遊客。好嘞，試問赤柱屋邨居民有冇遊客嘅消費能力呢？住得公屋多數係草根階層，於是乎街坊街里怨聲載道。
領匯曾經承諾過，一定會迎合公共屋邨居民嘅需要以及負擔能力，保障基層市民生活免受商戶租金上升導致貨品價格上漲而帶來影響。講係咁講，做係另一回事，領匯已經係另一個依靠高昂租金致富嘅地產霸權。
與其話終止優惠，不如話領匯取消扮好人，各位如果真係要丟路姆西，記住眼界要準！