俗語話，執輸行頭，慘過敗家。人類普遍有一種貪小便宜兼羊群心態，只要有着數，絕對唔放過，場面愈墟冚，愈唔肯執輸。商家就係利用人類呢種心態，經常以所謂優惠吸引消費者，結果往往大收旺場之效，同時亦往往出現混亂場面。
呢，一年一度嘅工展會尋日開幕，一開始就七國咁亂。事關部分商戶推出優惠貨品，包括一元鮑魚、一元海味福袋等等，係就係夠晒噱頭，可惜由於安排失當，開售時秩序大亂，大批市民爭先恐後，一擁而上，導致有人被推跌，幾乎搞出人踩人嘅慘劇，呢啲咪就係愈墟冚愈唔肯執輸嘅結果囉。
即係咁，作為一種宣傳手法，商戶以優惠貨品吸引眼光，招徠顧客，係無可厚非嘅，問題係，喺呢種人群擠迫嘅場合搞推廣活動，萬一場面失控發生意外，後果可大可小。正如有位參與搶購嘅市民話齋，商戶安排不當，令場面混亂，情況好危險o架。冇錯嘞，推廣活動本來係為咗宣傳，但如果出事咯喎，咁就弄巧反拙嘅喇，唔只收唔到宣傳效果，仲可能影響商譽，甚至可能搞出人命添。
功夫茶唔係危言聳聽o架，以前盂蘭節派米活動曾經搞出人命，有位婆婆因為心急排隊取米，唔小心失足跌倒，送院後證實不治。正所謂，「我不殺伯仁，伯仁因我而死」，盂蘭節派平安米，原意係替先人消災解難，行善助貧，點知好事變成壞事，你話係咪可悲吖？自從嗰次意外之後，慈善團體改善盂蘭節派米安排，先至冇再出現亂象咋。
而講到人踩人，相信大家應該仲記得九三年元旦凌晨蘭桂坊發生嘅慘劇。當時大批市民及遊客齊集蘭桂坊慶祝新年來臨，有人首先跌倒，導致人群如骨牌相繼倒下，結果造成二十一死六十三傷，成為香港開埠以來最多人死傷嘅人踩人慘劇。
一之謂甚，豈可再乎。工展會尋日嘅混亂無疑係一個警號，話就話今次冇導致嚴重後果啫，但下次未必有咁好彩o架，港府部門又好，有關機構及商戶又好，希望能夠吸取教訓，改善安排，唔好再搞出個大頭佛。話時話，工展會人山人海，幾乎水洩不通，究竟適唔適合搞呢啲推廣活動，真係要三思。而市民更加要記住，唔執輸還唔執輸，最緊要注意安全，千祈唔好因小失大吖。
總而言之，一年一度嘅工展會已經成為香港嘅標誌，除咗吸引本港居民，亦愈來愈受到外地遊客歡迎，萬一發生不愉快事件，唔只影響工展會本身，仲隨時影響香港國際聲譽o架。記住喇，工展零意外，香港人人愛！