政府搵咗全體局長下海拍攝政改宣傳片，繼前日環境局局長黃錦星打頭陣騎呢登場，叫大家「惜食」之餘亦要珍惜政改發言機會後，尋日就到財經事務及庫務局局長陳家強出場。佢一開波就話有好多人問佢投資心得，但其實投資亦要講時機，乘勢叫大家把握機會踴躍發表政改意見。陳家強表現算係唔錯，但最敗筆就係片尾無喇喇加插兩句「國泰民安、駿業雄圖」，唔睇前半部分仲以為佢發表緊新年賀詞，唔通佢想一片三用，除咗聖誕及新年外，去到農曆新年都仲未過氣？
