提到香港電台，大家應該記得前廣播處長朱培慶，呢一位處長大人由於作賊心虛，所以喺大批記者面前展現出「此地無銀三百両」嘅瘋狂舉動。簡單咁講，已婚人士朱培慶尋歡偷食，唔好彩遇見記者，結果佢東奔西跑甚至以拜倒石榴裙下嘅不雅姿勢逃避閃光燈。尋歡不成反露底嘅瘀事曝光之後，意興闌珊嘅朱培慶掛冠求去。
朱培慶事件引發一連串問題，到底港台員工係唔係一個二個行為不檢o架？行為不檢嘅後果會唔會造成浪費公帑o架？你知啦，港台作為公營機構係依靠納稅人維生o架。非常不幸，事實證明港台員工確係行為不檢，一次又一次揭發貪腐醜聞，不法之徒排住隊鋃鐺入獄。
好嘞，朱培慶已成歷史，石榴裙艷聞消散，新任廣播處長係一個叫做鄧忍光嘅仁兄，港台有冇改一改亂七八糟嘅混帳作風呢？睇情況咯喎，即使唔算浪費公帑，始終都係亂燒銀紙，一燒就燒幾十億，然後再燒幾千萬。
香港電台為咗大搞數碼電視廣播，導致將軍澳港台新大樓造價急升，由原定嘅十幾億元劇增至超過六十億，冇耐之前已經引起社會嘩然，外界人士無不做出O嘴表情。造價超支更加帶來一闊三大嘅後果，政府向立法會資訊科技及廣播事務委員會遞交嘅文件指出，為咗將數碼電視廣播覆蓋率由今年底試播時嘅全港七成半人口，逐步增加至二○一八年嘅九成九，港台必須於二十二個地點興建輔助發射站。
興建輔助發射站無財不行，究竟要使幾多錢呢？文件就話嘞，估計添置設備嘅費用係六千四百二十萬元，另加每年額外一千四百六十萬元經常性保養開支，將於明年首季向立法會財務委員會正式申請撥款。
咁都唔止喎，政府另一份文件指出，○九年港台擴大服務範圍之後，額外開設一個屬首長級第三級嘅副廣播處長（發展）職位，原定為期兩年於明年五月屆滿，不過未來五年係港台發展嘅關鍵時刻，需要高層首長級人員專責領導，所以建議將呢個職位延長五年至一九年五月為止。預計呢個職位嘅年薪連同福利係二百九十二萬元，五年即係一千四百六十萬元。
睇到呢度，大家係唔係覺得火滾呢？喂，港台新大樓造價超支幾倍已經令人牙痛咁聲啦，添置設備又話幾千萬，跟手又要延長一個薪高糧準福利高嘅職位，你估納稅人識生金蛋咩！
所以話啫，港台始終未戒得甩慷納稅人之慨嘅混帳作風。不如咁嘞，麻煩尊貴議員好好把關，港台向財務委員會申請撥款嘅時候嚴詞質問，唔可以任由敗家仔搞到傾家蕩產o架！