偷懶係人之常情，人類歷史上所有偉大發明，基本上目的都係為咗偷懶。就好似洗衣機咁吖，未發明之前人人洗衫洗到叫苦連天，發明咗之後疏肝咯，不必死搓爛搓再左擰右擰，名副其實慳水又慳力。
之不過咁，雖然話偷懶係人之常情啫，但係如果缺乏機器代勞嘅時候，人始終係要勤力工作嘅。譬如功夫茶嘅日常工作係寫稿，偏偏人類歷史上從來未發明得出「寫稿機械人」，試問功夫茶又點敢偷懶呢？即使真係有識寫稿嘅人工智能，你都未必夠膽搵佢代勞啦，萬一寫到狗屁不通兼且錯漏百出，蛇王偷懶嘅後果係炒魷都有之！
好嘞，功夫茶問問大家，世界上有冇能夠為清潔工人代勞嘅偉大發明？冇吖嘛，咁食環署員工蛇王偷懶肯定係大錯特錯啦。經常被投訴嘅食環署再次被投訴，今次嘅主角係負責處理紅磡一帶溝渠嘅兩名清潔工人，有人發現佢哋全日只係工作一粒幾鐘，其餘理應辦公嘅時間有公唔辦，兩條人形大懶蟲唔係閒坐就係瞓覺。食環署接到投訴之後，話就話會展開調查，不過拒絕公布結果。為民請命嘅立法會議員當然唔收貨啦，要求署方認真調查，並且向公眾交代。
類似嘅偷懶行為唔知被揭發過幾多次咯，冇耐前之嘛，馬鞍山有食環署嘅清潔工人被發現擅離職守，工作期間前往商場購物，有時又會睇股票，甚至返屋企休息，接近放工時間先至施施然去到指定地點打卡收工。
你知啦，清潔工人表面上身份卑微，實際上肩負一個好重要嘅社會角色，事關清潔工人一偷懶，通街通巷將會變得污糟邋遢。香港嘅衞生黑點多到嚇死人，其中一個重災區係中環蘇豪區，當地非法棄置垃圾嘅問題十分嚴重，食環署由一一年至今接獲二百宗投訴，平均五日接一宗。街坊積極反映問題，情況有冇改善呢？唔好意思，由於食環署係一個上上下下有懶齊齊偷嘅政府部門，所以中環蘇豪區一直都係垃圾成災。
點解話食環署上上下下有懶齊齊偷呢？簡單咁講，若然唔係上司懶得督促下屬，下屬係絕對唔夠膽蛇得就蛇嘅。正所謂嘞，強將手下無弱兵，同樣道理，勤將手下無懶兵。正正係因為食環署管理層懶到出汁，於是乎香港遍地都係垃圾冇人執！
辦公時間偷懶，唔代表放工之後繼續游手好閒喎。食環署曾有一個叫做李育奇嘅醫生，由衞生署轉職食安中心之後，擔任食物監察及管制科風險管理組緊急應變小組醫生，放工之後居然秘撈兼職，而且長達五年之久，先後喺幾間醫務中心應診，甚至喺食安中心辦公時間處理醫務中心事宜。竟然會有咁離譜嘅事，你話係咪管理層懶得監管吖！