如果話，潑皮無賴、死不認錯係菲律賓政府嘅獨特文化，咁優柔寡斷、畏首畏尾應該就係港府嘅一貫作風咯。大家應該記得，港府上月初係威係勢，向菲律賓政府發出最後通牒，要求一個月內解決馬尼拉人質事件，否則就會採取制裁措施。唔經唔覺，一個月死線已經過晒限期，菲律賓方面依然無聲無息，詐傻扮懵，你話最後通牒係咪笑話吖！
是可忍，孰不可忍。人質慘案發生咗三年幾，死者沉冤未雪，生還者傷痛未平，港人未能討回公道，港府仲喺度等運到，靠佢哋為市民出頭，簡直嘥氣。所以咯喎，有立法會議員忍無可忍，提交私人草案，建議修改條例，分階段限制菲傭來港工作。草案內容大致係咁嘅，由一四年四月起停止批出新菲傭合約，一五年一月起升級至不准約滿菲傭續約，到一五年七月則禁止所有菲律賓護照人士入境，一步步擴大制裁措施，睇吓菲律賓「三世祖」總統仲笑唔笑得出。
以限制菲傭及菲籍人士來港作制裁手段，大部分港人絕對贊成o架。一來，打蛇打七寸，對付三世祖呢類嬉皮笑臉嘅小人必須拳拳到肉，依家喺香港工作嘅菲傭多達十六萬，每年為菲律賓創造四百億港元外匯收入，呢條大水喉一旦被截斷，菲律賓政府仲唔震過貓王？二來咯喎，菲律賓無賴政府欺善怕惡，如果港府唔狠狠出手，顯示決心，還以顏色，三世祖仲以為港人真係「放低咗」添！
都係嗰句啦，人必自侮而後人侮之。港府係時候清醒喇，香港人唔係唔願意同菲律賓政府談判，而係對方一直玩拖字訣，就算派人來港商討，都係反口覆舌，五時花六時變。呢，一時故意洩露會談內容，一時假稱死者家屬及傷者原諒菲方，一時又責怪香港人命比菲律賓人值錢，一時又將「道歉」改為「悲傷」，花樣百出。正所謂，當斷不斷，必受其辱。菲律賓政府存心拖延，港府唔可以再拖落去，一係雷厲風行，採取制裁措施，一係自認無能，咪當白白畀人羞辱囉，反正港府都被人羞辱慣嘅啦。
講開又講，限制菲傭來港工作無疑係雙刃劍，制裁菲律賓嘅同時，亦難免為本港家庭帶來不便，不過咁，兩害相權取其輕，喺港人尊嚴及是非原則面前，係不容退讓嘅，小小犧牲在所難免，亦在所不惜。退一步講吖，香港外傭成個聯合國咁，印尼、泰國、尼泊爾，大把選擇，依家連緬傭都有添，唔一定要揀菲傭啫，係咪？
一句講晒，香港人唔係臘鴨，絕對唔能夠不了了之，更加唔能夠畀三世祖輕易過骨！