新聞新聞，一切要新，如果唔係就會變成舊聞。點先至叫做新呢？咁就不得不提一個快字，如果報道新聞冇辦法掌握第一時間，隨時會淪為講波佬口中嘅三大缺點：跑得慢，唔夠快，冇速度。亦即係話，報道要夠快先至係新聞，冇速度嘅就要執人口水尾。
求新求快之餘，新聞亦更加要準喎，萬一報道唔準確，隨時會淪為大笑話o架。慘痛例子莫過於有電視台「獨家報喪」，錯誤報道國家領導人死訊，差啲唔死都畀佢激死。呢啲消息快就係快嘞，可惜聲大夾冇準，所以自毀形象搞到冇乜公信力。
功夫茶今日要講嘅係，東方報業集團全新旗艦網站「on.cc東網」嘅新聞快夾準，絕對唔係賣花讚花香咁簡單！
你知啦，網民可能係今時今日時事觸覺最敏銳嘅族群。呢嗱嗱嗱，就舉一個例子吖，引起全港關注嘅九龍城「盜B案」持續咗一段時間終於有突破性進展，警方前日以非法處理屍體罪名拘捕咗失蹤女嬰俞凱晴嘅媽媽，懷疑佢自編自導自演「盜B案」，呢個消息當日第一時間出現於「on.cc東網」，並以全港最快嘅「推播通知」功能率先通知手機用戶，轟動全城。好嘞，跟住落嚟係點呢？巴閉咯，呢單新聞被社交網站推介咗接近五千次，瀏覽頁次超過三十五萬。
功夫茶問問大家，若然一單新聞唔係快夾準，你會唔會推介出去吖？之不過咁，大家千祈唔好問功夫茶，連日以來關於盜B案嘅推介同瀏覽到底有幾多，因為東網嘅新聞不斷更新，讀者不斷關注，推介同瀏覽嘅次數實在太多嘞，功夫茶冇可能答到你。
「on.cc東網」受到廣大網民愛戴，新聞夠快夠準固然係最大原因，另外一個關鍵係東網提供手機Apps「推播通知」功能，關心時事嘅讀者一打開手機，立即知道呢一個世界發生緊乜嘢事，第一頁已經能知天下事。除咗萬眾矚目嘅盜B案之外，快夾準嘅新聞包括H7N9禽流感殺入香港，政府委任馮煒光做新聞統籌專員，警方拘捕「粉末案」疑犯等等，東網Apps都即時推播。至於玩具大王蔡志明之子蔡加讚及模特兒汪圓圓日前舉行世紀婚禮，東網獨家全程直擊，並即時圖文並茂報道婚禮盛況，莫講話讀者睇得開心，連參與婚宴嘅親朋好友以及主人家都讚不絕口。
「on.cc東網」作為東方報業集團嘅旗艦網站，革新面世一個月以來好評如潮並且大受歡迎，單月不重複瀏覽人數多達三百一十二萬，簡直係人氣鼎盛。讀者除咗來自香港，仲有百分之四十二屬於海外，換言之，東網影響遍及全世界。仲有吖，手機Apps包括Android同iOS嘅下載安裝次數達五百五十萬，你話唔係人見人愛都唔得啦！