侵犯私隱係一件相當令人厭惡嘅事情，否則曾經効力中情局嘅走佬特工斯諾登都唔會大義滅親，一腳踢爆美國政府大規模監控全人類，除咗恐怖分子同無辜民眾之外，連理論上同聲同氣嘅盟國元首都唔放過，激到德國總理默克爾生蝦咁跳。
做人要有私隱，就好比出街一定要着衫，你試下剝光豬赤條條走出街吖，肯定會覺得尊嚴掃地，仲隨時被警察拉添。所以咯喎，人權意識愈來愈高漲嘅今時今日，保障私隱係非常重要嘅，正因為咁，個人資料私隱專員公署責無旁貸，必須做好呢份工捍衞小市民嘅私隱線。
之不過問題係，捍衞私隱線點先至能夠取得平衡呢？舉一個例子吖，有一個男仔想追女仔，明查暗訪知道咗對方姓乜名乜，連電話號碼都攞埋，幾時生日亦一清二楚，算唔算侵犯私隱呢？有人可能會話，睇下個男仔係唔係英俊瀟灑啦，靚仔追女仔唔算侵犯私隱，醜男查家宅直情係性騷擾添啦。係呢，咁算唔算歧視？
嗱，私隱專員公署發表調查報告，點名批評一間連鎖健身中心總共收集咗二十二萬名新舊會員嘅身份證或回鄉證副本，以及完整嘅出生年月日，屬於超乎適度嘅收集資料，侵犯咗顧客嘅個人私隱。私隱專員話喎，呢間健身中心冇從三年前嘅八達通事件中吸取教訓，重犯錯誤，私隱公署已經向健身中心發出執行通知，指令糾正問題，防止再次發生。
不過咁，對於侵犯私隱嘅指控，該健身中心就唔認同，會提出上訴咁話。根據佢哋嘅講法，收集身份證或回鄉證副本係為咗識辨申請人身份，當器材或設施損壞嘅時候能夠透過法律途徑追討。另一個目的係避免員工欺詐，防止捏造申請人騙取佣金。對於健身中心嘅反駁，私隱公署認為公司知道申請人嘅身份證號碼、年齡範圍同生日月份已經足夠，對健身中心嘅做法表示遺憾。
即係咁，家陣嘅關鍵唔係身份證號碼，而係確實嘅出生日期，一間公司知道顧客何年何月何日生，算唔算侵犯私隱呢？呢家嘢確係有得拗，有人認為年齡係秘密，有人覺得唔係咁重要，反而身份證號碼更加唔能夠輕易落入陌生人手中，點知你會唔會做出乜嘢不法行為加架。過去四年，私隱公署收到九百幾宗投訴，以及六千多宗關於使用身份證副本嘅查詢，顯示呢個問題確實幾嚴重。
總而言之，私隱線肯定係要捍衞嘅，不過平衡點同樣重要，千祈唔好矯枉過正吖。計功夫茶話齋，私隱公署平時無所事事，如果連市民私隱都保障唔到，咁就摺埋都得咯。