十元一注獨中六合彩頭獎嘅幸運兒誕生咗嘞，派彩九千萬元。一注獨中嘅意思係冇你份又冇我份，全港幾百萬人發財夢碎，必須繼續任人宰割，捱生捱死賺錢交電費。
普通家庭交電費已經牙痛咁聲，若然係做生意，每月電費數以萬計，你都咪話唔吃力。好衰唔衰電力公司係壟斷性經營，而且得到政府協議承諾，有權賺盡百分之九點九九嘅准許利潤。於是乎，電力公司完全可以撳住搶。有人話，人生有兩件事避無可避，第一件事係死亡，第二件事係交稅。其實仲有第三件事o架，就係交電費。你試下唔交電費被斷電吖，你嘅生活將會好似石器時代嘅穴居人。
中電同港燈前日公布明年電費調整幅度，以及之後四年嘅電費調整預測。港燈話喎，明年五十六萬用戶電費維持不變，之後四年亦毋須加電費。中電就話嘞，明年加電費百分之三點九，超過一百五十萬用戶要多交電費。中電更加事先張揚，為咗配合政府嘅減排目標，二○一五年起增加貴價西氣東輸天然氣用量一倍，預計未來五年累積電費加幅接近四成至每度電一元四毫八仙五，打破歷來港燈電費高於中電嘅局面。
中電上半年業績錄得三十八億元盈利，有冇必要加價呢？即使要加，有冇必要加咁多呀？其實，近年煤價大幅下調，減輕發電成本，中電唔減價不特止，仲要繼續加價，簡直離晒大譜。中電嘅數字遊戲係咁玩嘅，該公司話電費穩定基金結餘不足，現已跌至八百萬元，必須大幅調高基本電價，從而令到電費穩定基金結餘充足，達到三億元左右。咁即係本末倒置啫，難怪惹來立法會議員質疑，電費穩定基金嘅原意明明係將多賺利潤儲起，作為降低電費升幅之用，家陣竟然成為加價藉口，極之唔合理囉。
電費只加不減，蟻民個個叫慘。正如有食肆東主話齋，現時經營成本好重，即使冇客冇生意，電費開支都冇得慳，加上租金食材等等成本樣樣加價，如果唔轉嫁消費者隨時做唔住。
有冇辦法阻止電魔搵笨呢？有係有嘅，可惜負責把關嘅官僚實在廢柴，既冇能力監管，又冇辦法將電力公司嘅准許利潤上限調整至合理水平，結果咪惟有任人予取予求囉。中電仲大大聲話，上市公司要向股東交代，要有穩定回報喎。問題係，中電作為公共事業機構，除咗向股東交代之外，又需唔需要向市民交代呢？