親愛嘅讀者應該記得，功夫茶曾經講過，東方報業集團全新旗艦網站「on.cc東網」嘅新聞不但快夾準，而且會與時並進不斷推陳出新，竭誠為全球華人提供優質服務。吹水唔抹嘴嘅政治家就話講咗等於做咗啫，一向坐言起行嘅東方當然係講得出做得到啦，所以咯喎，功夫茶今日再講一個好消息，東網已經推出「相關新聞」嘅嶄新服務。
何謂相關新聞呢？舉個例子吖，荃灣發生一宗駭人聽聞嘅「衣櫃藏屍案」，女死者係情傷纍纍嘅俏空姐，全人類都非常關注呢一單咁哄動嘅新聞，梗係想知道事態有乜嘢發展㗎啦。大家若然喺眾多不同條目之間查閱，大海茫茫一定覺得唔方便，於是東網就給予貼心服務，將衣櫃藏屍案嘅相關新聞集中處理，等各位一目了然，三日之內所發生過嘅相關新聞都可以一覽無遺，一清二楚。
衣櫃藏屍案固然萬眾矚目，人人最想知道嘅係辣手摧花嘅冷血兇手到底係邊個，不過由於東網實在太受歡迎嘞，所以其他新聞同樣炙手可熱。好似十二月八日嘅「特首校慶致辭半百中大生離場抗議」咁吖，一瞬間網上已經有四千六百個推介，證明東方全新旗艦網站嘅滲透力係幾咁無遠弗屆，影響力簡直無與倫比。
「on.cc東網」革新面世一個月以來好評如潮，單月不重複讀者人次錄得三百一十二萬，每日瀏覽總頁次一千五百萬，簡直係人氣鼎盛。至於全球免費開放嘅電子報，上星期平均每日有九十五萬人次，單計十二月六日星期五就更加錄得一百四十七萬，你話係咪捧場者眾呢！
家陣上網唔一定用電腦，用智能手機一樣得，東網嘅手機apps亦係網民嘅上上之選，兩個平台合共下載同安裝七百一十萬次。
一講到智能手機兩個平台，大家都知道係Android以及iPhone所用嘅iOS。有一件事功夫茶想提提大家，若然閣下打算換手機，似乎Android會好少少，事關用上手嘅感覺係比較親民。就以東網嘅手機apps為例吖，更新嘅速度快得多，不出六小時就可以全球更新，反觀iOS咯喎，要等四日至兩星期先至有得更新，實在令人覺得費時失事。
其實講真吖，幾年前蘋果教主喬布斯未仙遊之前，iOS確係能夠雄霸智能手機市場，不過時移世易咯，家陣嘅市場佔有率係Android從後趕上。今時今日全球智能手機嘅分布比率，Android佔逾八成，iOS只剩下一成幾，孰優孰劣，大家心中有數。
點都好啦，功夫茶鄭重敬告各位讀者，東網推陳出新，服務更加貼心！