有人話，教育不公係最大嘅不公，教育腐敗係最大嘅腐敗。究竟點解？道理好簡單啫，教育唔只關乎學生成績，而且關乎社會未來，如果教育唔公平或者腐敗，社會就冇未來㗎喇。好似內地咁吖，貪腐之風愈刮愈烈，連教育都受到嚴重污染，學校紛紛淪為學店，一間大學嘅招生處處長居然可以貪污幾億元，問你怕未！
香港話就話實行一國兩制，與內地制度唔同，不過講到教育咯喎，同樣係七國咁亂，淨係直資學校咋，就問題多多，長爆長有。呢，三年前審計署報告踢爆直資學校無王管，帳目一塌糊塗，唔清唔楚，七十幾間直資學校中約九成有問題，引起社會嘩然。教育局經檢討之後，舊年先至姍姍來遲向直資學校發出指引，要求各校於上月底前喺網頁上載周年報告，包括財務表，詳細列明支出同獎助學金等資料。
好嘞，依家限期已過，直資學校有冇照做呢？本報調查發現，個別學校到依家仲未上載周年報告，就算已上載嘅學校，亦全部採用教育局統一格式，只提供收入及開支分項所佔嘅百分比，實際數據欠奉，外界根本無從評估真實財務狀況。即係話，上載咗等於冇上載，嘥氣！
嗱，教育局規定直資學校必須撥出學費總收入嘅一成作為學費減免或獎學金，但學校嘅年報淨係顯示學費減免或獎學金佔整體開支嘅比重，完全冇意義。仲有吖，當局規定直資學校嘅營運儲備上限最多只能夠相等於一年開支，但學校普遍含糊交代，個別學校嘅儲備居然可以維持三十幾個月開支，問你服未。
好明顯，咁多年來直資學校嘅透明度唔只冇提高，反而倒退咗，以前大部分學校財務表都有列明具體數字，依家就淨係列出一堆百分比，睇到你一頭霧水。教育局仲死撐，話各校開支金額唔同，列出實際數字唔公平喎，簡直九唔搭八。其實，要求每間學校列出具體數字，一視同仁，一清二楚，點會唔公平呢？
正如古人話齋，爾俸爾祿，民脂民膏。直資學校由公帑資助，教育局淨係識得畀錢，唔識得監管，根本就係搵納稅人笨，咁叫做公平咩？近年傳統名校紛紛轉為直資學校，教育愈來愈貴族化，變相將基層子弟拒於門外，咁又叫做公平咩？
講到尾，香港貧富懸殊不斷惡化，尤其係跨代貧窮情況愈來愈嚴重，主要就係因為教育不公。教育局一方面放任傳統名校轉為直資學校，另一方面又對直資學校不監不管，連財務報表咁簡單都搞到一塌糊塗，你話係咪抵鬧吖！