又故障，又故障，豈有此理又故障！
港鐵平時故障頻頻已經怨聲載道啦，今次更加離晒大譜，列車跪低一跪就幾粒鐘，簡直令人忍無可忍！
昨日中午時分，砰嘭一聲巨響，油塘站乘客驚到心肝仔卜卜跳，有人以為發生爆炸。消防處接報到場，出動多輛消防車同救護車戒備，喺油塘站協助疏散乘客，初步懷疑係站與站之間嘅電纜折斷，所以傳出巨響。之不過咁，港鐵事務總經理王美琪澄清，只係架空電纜跳掣發出聲響啫，冇爆炸咁話喎。
唔理你係爆炸、斷纜定係跳掣，故障係鐵一般嘅事實，將軍澳線全線暫停服務，觀塘線調景嶺至藍田站亦都受到影響，擾擾攘攘五小時。喂喂喂，大佬呀，雖然事發當時唔係繁忙時段啫，不過乘客仍然人頭湧湧喎，列車跪低咁長時間，靠害咩！
港鐵係就係安排免費接駁巴士接載乘客，巴士途經觀塘、藍田、油塘、調景嶺、將軍澳、坑口、寶琳同康城站。之不過可惜吖，安排得混混亂亂。好似觀塘站外嘅協和街，冇錯係有接駁巴士送乘客去將軍澳，不過要等半小時以上先至上到車。你知啦，呢幾日冬雨綿綿落個唔停，溫度又拾級而下愈降愈低，大批乘客冒雨等車狼狽不堪，人龍車龍逼滿成條街，你想佢哋唔鼓譟都難啦。
立法會交通事務委員會主席陳鑑林認為，事故影響非常大，將以懲罰機制對付港鐵，希望好好吸取教訓。交通事務委員會副主席范國威形容，今次係港鐵十年來將軍澳支線最嚴重事故，但係應變措施猶如「倒瀉籮蟹」，職員未能清晰指示市民乘搭其他交通工具，事故發生之後一個半小時都冇喺寶琳站安排接駁巴士，促請運輸及房屋局要求港鐵提交事故報告。
功夫茶每次聽到港鐵故障就無名火起，點解？因為呢一間公司年年賺錢年年加價，加完價之後又冇改善服務質素喎，反而水準每況愈下。好似今次咁大劑吖，部分乘客要摸黑行落路軌，再上去月台離開，你話幾鬼死惡頂呢！
啟動懲罰機制對付港鐵當然正確，不過各位議員同官員千祈要注意，若然施以巨額罰款，一定唔容許港鐵借頭借路加價彌補損失，務求罰到佢哋入肉知驚！
講開又講，官老爺曾經話過檢討港鐵票價可加可減機制，包括加入計算市民負擔能力嘅因素、港鐵盈利同服務表現。如果票價機制真係要同服務表現掛鈎，唔使講咁多廢話，港鐵莫講話冇資格加價，直情要減價添啦！
年年加價，服務又差，好心作為大股東嘅特區政府認真整頓一下，以免港鐵不斷跪低咁羞家！