貪曾一門四腐 香港官場墮落

人哋就一門四傑,前特首曾蔭權爵士就一門四腐,真係睇見都眼火爆。最慘嘅係貪曾遺禍沒完沒了,腐敗風氣唔知幾時先至有機會戛然而止,廉潔奉公作為核心價值日日夜夜受到威脅。

一門四腐講嘅係邊四個呢?第一個當然係貪曾自己啦,第二個係前政務司司長許仕仁,第三個亦係前政務司司長,不過係唐英年,第四個係前廉政專員湯顯明。除咗貪曾一腐受調查之外,另外三腐幾乎同一時間受到唔同形式嘅詰難。

先講湯顯明吖,立法會政府帳目委員會發表報告,非常罕有咁用上「痛斥」嘅字眼狠批貪湯,對佢任內嘅貪腐醜聞予以譴責、表示震驚以及強烈不滿。又難怪立法會咁大反應嘅,貪湯嘅公務酬酢、外訪同饋贈方面都有不足以及違規之處吖嘛。

帳委會發表報告之後,普羅大眾又點睇呢?「東方報業民意調查」結果顯示,三成六受訪者認為貪湯醜聞破壞廉署公信力;三成三覺得香港廉潔聲譽受損;兩成六直斥貪湯視規章制度如無物,貪得無厭。

至於唐英年咯喎,雖然受到制裁嘅唔係佢本人,而係佢老婆,不過唐唐都難辭其咎。唐太郭妤淺承認九龍塘約道大宅僭建,法官決定罰款十一萬元,判刑係近十年同類案件之中最重。

對於唐唐嘅僭建風波,上述民意調查結果顯示,三成三受訪者狠批唐英年知法犯法,肆無忌憚;三成二斥責前朝政府亂象叢生;兩成六認為高官誠信破產。

許仕仁作為一門四腐其中嘅重量級人物,目前不但由於干犯貪污罪接受法庭聆訊,而且已經淪為一個破產人士。由於許老爺無法清還巨額欠債,所以大債主東亞銀行入稟申請佢破產,高等法院又接納申請而頒令,許仕仁變咗第一個破產嘅大紫荊勳章得主。一提到許仕仁,三成九受訪者認為官官相衞,狼狽為奸;三成二坦言對高官徹底失望;兩成三形容香港官場墮落。

係呀,確係官場墮落o架,鬼叫貪曾帶頭搞到亂七八糟咩。由於貪曾治下有多名高官捲入醜聞,所以四成七受訪者直斥上樑不正下樑歪;兩成八狠批前朝政府烏煙瘴氣;一成八指摘貪曾管治不力,禍港七年。

眼火爆還眼火爆,功夫茶始終要問一句,廉署調查貪曾幾時先至有一個了斷呢?你知啦,肅貪倡廉最有效嘅其中一招係打老虎,殺一儆百先至有阻嚇力,否則大官小吏唔知驚亦都唔知醜o架。若然廉署調查貪曾繼續一拖再拖冇下文,就算冇咗貪湯為患,廉署都好難再次建立良好聲譽,市民認為你官官相衞、狼狽為奸就該煨啦!