種善因必得善果，有愛心就會有奇迹。茵茵出院啦！多謝本報讀者關懷支持！多謝善長仁翁慷慨解囊！多謝晒！
喺廣華醫院治療超過半年嘅茵茵吉人天相，經過醫護人員悉心照顧，終於踏上康復之路。醫生話，茵茵現時嘅情況十分穩定及良好，唔需再依靠任何醫療儀器協助呼吸，為咗令佢可以盡早投入正常生活，尋日批准佢出院返屋企。出院前，廣華醫院仲同佢開咗個生日派對，正所謂雙喜臨門，樂也融融。功夫茶同各位讀者一樣，祝小茵茵生日快樂，快高長大。
病魔無情，人間有愛。患有罕見先天性單邊肺部發育不全綜合症嘅茵茵，一出世就要靠呼吸機生存，每日面對死神威脅，今年二月送入醫院留醫，但一直未見起色。要醫好呢種病，必須喺氣管植入金屬支架幫助呼吸，可惜本港醫院冇做呢種手術嘅經驗。幸好天無絕人之路，本報七月中報道咗茵茵嘅病情之後，讀者紛紛致電查詢，其後東方日報慈善基金同太陽報愛心基金登高一呼，唔止全港，直頭全球讀者都積極回應，紛紛解囊義助茵茵赴台灣榮民總醫院治療，善款數字累積超過港幣一百八十萬元。
港人愛心爆棚，善款源源不絕，係一大奇迹。而醫生妙手回春，手術成功，令茵茵可以迅速康復，更加係杏林奇迹。仲有吖，為咗避免茵茵出院後病情突然出現反覆，要準備定手提急救器等醫療儀器做後備，有間醫療器材公司職員知道東方日報慈善基金同太陽報愛心基金幫茵茵定購儀器，即時主動打折，仲承諾會隨時提供協助，可以講係另一項愛心奇迹。
所以話，茵茵喜獲重生，係港人用無數愛心創下嘅奇迹。邊個話香港人情薄過紙？正如茵茵爸爸話齋，「真係好多謝咁多善長，仲有醫生同護士，佢哋真係好好人！」
為咗繼續發揚各位善長嘅愛心，東方日報慈善基金同太陽報愛心基金扣除茵茵赴台做手術所需嘅費用後，會將今次籌得善款嘅餘額撥入兩個基金，幫助更多有需要嘅人，務求令香港人嘅愛心創造出更多奇迹。
事實證明，只要有愛，世界就會更美麗。就以菲律賓槍手屠殺香港人質慘劇嚟講，慘劇發生後，香港一片愁雲慘霧，但好多人喺悲憤之餘，就好似關心茵茵一樣，以各種方式對受害者及佢哋嘅家人表達愛心，伸出援手。呢，連日來有唔少團體發起募捐，有人願意收養遺孤，有人願意資助遺孤讀書，有人為受害者設立基金……香港人以自己嘅愛心展示出人性嘅光輝。
計功夫茶話齋，相比起菲律賓槍手嘅冷血，以及菲律賓政府嘅冷漠，港人對茵茵嘅慷慨相助，對人質慘劇受害者嘅熱切關懷，都印證咗香港係一個充滿愛及充滿溫情嘅城市。大愛無疆界，香港有希望！