呢嗱嗱嗱，賭禍真係害人不淺㗎，尤其係賭到老竇都唔記得姓乜嘅地下六合彩，最近又有兩公婆可能因此雙雙斃命！
八月二十四日中山市揭發奪命血案，阿仔同女朋友返到屋企，一打開門就見到阿媽死咗，一身都係血，去到洗手間又見到阿爸死埋。晴天霹靂嘅阿仔當然打電話報警啦，警方初步透露：「案情並不複雜，很快就會有結果。」當地記者追查之下，發現男死者生前好鍾意買六合彩，有時會因此同老婆發生爭執，街坊形容「兩人不和」。
當然啦，暫時冇人夠膽講六合彩同命案有直接關係，之不過咁，係人都知倫常慘劇通常夾雜好多日積月累嘅因素，冰凍三尺非一日之寒吖嘛，所以你又唔可以排除六合彩係其中一項因素。
大家記唔記得較早前廣州發生一宗轟動全國槍擊案？有人手持槍械以及爆炸品同公安對峙十小時，期間子彈橫飛，最後公安將槍手擊斃。名叫陳國勝嘅死者又係畀六合彩害到雞毛鴨血，根據遺孀透露，老公原本好聰明，經營運輸業逐漸致富，不過自從接觸過地下六合彩之後就好似變咗另一個人咁，輸光二十萬積蓄不特止，性格仲開始失常，經常大吵大鬧，又聲稱「惡魔追殺」。名副其實賭到傻咗嘅陳國勝終於狂性大發槍傷公安，結果自取滅亡。
唉，以前有鴉片搞到中國人淪為東亞病夫，家陣喺內地無孔不入嘅六合彩賭禍其實不遑多讓，一樣足以禍國殃民。講來講去，又係官商勾結，執法人員放軟手腳，開賭莊家眉開眼笑。更加荒謬嘅係，涉嫌以六合彩報大發黑心財嘅居然係共產黨眼中釘，黎智英淫賤黎。
有三份港產六合彩報叫做《創富》、《六合皇》同埋《貼士皇》，承印嘅係超企印刷及傳訊有限公司，呢間公司其中一個董事就係淫賤黎。有人將呢三份六合彩報定時定候走私運上內地，源源不絕送到賭徒手上。前一排，可能緝私風聲太緊啩，三報承印人鬼鬼祟祟改咗名。之但係，後來搞下搞下又變番淫賤黎旗下。就好似今次中山雙屍血案，現場就發現《六合皇》。
六合彩報喺香港係「合法印刷、非法出境」，喺內地就係「非法入境、公然販賣」，點解冇人取締嘅呢？點解任得老百姓賭到家破人亡？計功夫茶話齋，你睇睇今次菲律賓屠殺香港人事件，你就明白貪污舞弊係幾咁累事。菲律賓貪污貪到婦孺皆見，一連幾個總統都係衰貪污而落台，所以咯喎，經費唔知畀邊個吞咗嘅警隊咪冇錢買裝備囉，救人表現咪廢到冇朋友囉，平時連買子彈訓練都冇錢，特種部隊咪變咗特蠢部隊囉。好嘞，睇番中國，貪官一定唔會比菲律賓少，你叫內地公安積極冚賭？人哋睬你都傻！
話時話，有人將六合彩報走私北上未必只係想發黑心財咁簡單，難保佢哋嘅動機唔係利用病態賭徒炮製大量破碎家庭，從而社會動盪，繼而亡黨亡國。喂，淨係貪污一瓣已經可以亡黨，貪官包庇地下六合彩，再加上爛賭一瓣，亡國真係話都冇咁易！