皮雅斯叫陣：小心阿堤斯茅波

生於洛杉磯嘅「PP」皮雅斯，今周將會重返家鄉比賽，屆時亦會同住在加州嘅家人及朋友見面，雖然佢哋一直都係湖人死忠粉絲，但自皮雅斯加盟塞爾特人後，家人都已經轉軚支持塞軍。皮雅斯賽前就講笑話：「總決賽門票實在太貴，為咗請家人同朋友入場支持，肯定要使一大筆錢。」

禪師反指加納特至茅

塞、湖兩軍近三季第二度在決賽碰頭，與前季最大分別就係「紫金兵團」陣容更強，今季補充咗防守專家阿堤斯，屆時肯定會Mark實皮雅斯。「PP」就話，過去十年一直與阿堤斯交手，所以佢已熟晒阿堤斯嘅陰招，例如抓住你、抱住你及「剝褲」，皮雅斯就曾經在04年一場賽事中，被當時効力溜馬嘅阿堤斯拉低半條褲落膝蓋而露出內褲，所以皮雅斯提醒隊友要小心。

不過公說公有理，那邊廂湖人教練積遜，就反指塞爾特人巨頭加納特先係最茅嘅球員！積遜話加納特在東岸決賽中，每每防守杜域侯活時都「出手」，不斷打「魔獸」手臂，防守招數非常毒辣。其實「禪師」積遜向來愛出口術，今季就先後發言攻擊過雷霆主將杜蘭特及鳳凰城領袖拿殊，估唔到今次就輪到加納特。

本報綜合報道