依家好多人可能唔知稻草人係乜，以前農民將稻草紮成人形，上面披件舊衫，再插上葵扇、風車等，用嚟驅趕雀仔，保護農作物。不過咁，有啲雀仔好醒，見得稻草人多，知道淨係得個樣，一味靠嚇，根本唔打得，所以雀仔完全唔驚，照樣偷食可也。同樣道理，如果法例唔嚴格執行，遲早好似稻草人咁，冇晒阻嚇作用。
民以食為天，食物安全唔講得笑，所以對食肆嘅監管絕對唔可以求求其其，是是但但。冇錯，食環署話就話早就設立咗違例記分同停牌制度，確保持牌食肆合法經營，保障食品安全。可惜，食環署做嘢懶懶閒，有法例等於無法例，食肆直情當冇到，甚至連「釘牌」都未驚過。一字咁淺，食環署乜都唔做，自廢武功，咪變相鼓勵食肆違規囉。
呢，灣仔寶靈頓道晚晚都有食肆將大量枱櫈擺出店外做生意，連橫巷都霸埋，街坊幾乎冇路行，搞到環境烏煙瘴氣不特止，噪音聲浪更令人冇覺好瞓。附近居民多次向食環署反映，結果都係石沉大海，情況一直冇改善。有居民投訴話，其中一間食肆前排已被食環署停咗牌，但照樣開爐做生意，枱櫈照樣擺出街。本報向食環署查詢，署方證實有關食肆四月廿二日已經被記滿分，仲釘埋牌添。
咁就奇嘞，食肆無牌經營咗大半個月，食環署居然仲烏吓烏吓，接到本報轉介嘅投訴先知道有人違例經營，再作出檢控。講真，如果投訴冇人轉介，署方可能根本唔會去現場巡查，更唔使旨意班懶官會對違規食肆採取任何行動。
食肆職員唔止直認違規擺枱阻街，仲話交罰款當畀租，似乎咁做已經係家常便飯，完全當食環署冇到。有知情人士踢爆，「冇人投訴，食環署睇都唔睇吓，直情無王管咁」。當局有法不依，執法不力，法例形同虛設，違規食肆有乜理由唔愈來愈肆無忌憚吖？
話時話，莫講食環署間接「放水」，原來行內人早就知道，就算當局揸正嚟做釘埋牌，只要搵另一個人做持牌人，食肆就可以當乜事都冇發生過，繼續打開門做生意。咁大嘅漏洞存在，當局知唔知？有冇諗過點樣堵塞？正如有立法會議員話齋，食肆被釘牌後繼續違規經營，等同藐視法律，必須嚴肅處理，必要時更應該提高刑罰，以收阻嚇作用。
不過咁，完善法例又好，提高刑罰又好，如果當局繼續隻眼開隻眼閉，立咗法唔執法，咪又係盞嘥氣。唉，食環署係咁，同樣屬食物及衞生局管轄嘅衞生署咪又係食嘢唔做嘢，好似對中成藥嘅監管咁，有關中成藥註冊嘅條文，通過咗超過十年仲未正式實施，就算中成藥頻頻出事，當局一樣無動於衷，根本唔將市民健康當回事。
大家咪睇呢班高官個個英明神武，至弊個個腦生草，淨係識得戙喺度郁都唔郁，十足稻草人咁，香港又點會有運行呀！