弊傢伙！近排接連有市民食咗帶子後中毒，最得人驚嘅係，毒帶子源頭居然成為無頭公案，來自何方，當局依家仲係矇查查。咁搞法，香港「美食天堂」呢塊金漆招牌，好快就要改名做「咪食天堂」咯。
食物安全中心尋日為毒帶子事件解畫，證實本港五月中以來有二十八人食咗帶子、扇貝等海產之後出事，懷疑有毒嘅海產來自九個街市。當局事後抽取三十個雙貝類樣本化驗，其中兩個對麻痹性毒素呈陽性反應，即係有毒咁話。
咦，既然知道問題海產喺邊度買，順藤摸瓜咪得囉？可惜，知道毒海產喺邊度買唔等於知道毒海產從邊度嚟。食物安全中心承認，由於批發及零售商保存嘅單據唔齊全，未查到問題帶子嚟自邊度。當局又話會向立法會提交《食物安全法》條例草案，建議規定批發及零售商必須保留入口海產單據至少三個月，以便追查產地來源喎。
咪住！如果冇記錯嘅話，九九年本港發現深海魚類受雪卡毒污染，當時已經有立法會議員要求政府立法規管，以便及時追查問題海鮮來源。點知當局拖咗十年有多，到依家仲未做嘢，食品安全監管咁兒戲，有冇離譜啲吖？
講開食品安全監管，真係把幾火。咁多年嚟，本港食品安全事故多多，威脅幾乎從未停過，海產、蔬菜、肉類乜都出事。但係政府鑊鑊都係頭痛醫頭、腳痛醫腳，一係「以不變應萬變」乜都唔做，一係求求其其做啲門面工夫就算數。
呢嗱，孔雀石綠淡水魚、山埃蘇眉、蘇丹紅鹹蛋、哮喘藥豬肉、農藥毒菜，仲有三聚氰胺毒奶等等，統統都喺香港出現過，而且次次都係其他地方先踢爆，香港班官員先至如夢初醒。唔使問阿貴，本港食品安全監察機制好明顯存在漏洞，當局把關不嚴，罪無可恕，但佢哋除咗扮吓嘢敷衍市民，仲做過啲乜？
《食物安全法》唔知幾時至成事，依家毒帶子又殺到，除咗本港，仲禍及澳門及廣州、珠海，真係愈諗愈得人驚。不過咁，人哋澳門已經即時要求街市停售帶子，以防萬一，但本港食物及衞生局居然淨係呼籲市民「唔好食咁多」，真係靠害。唔好食咁多？咁究竟可以食幾多吖，又？
食物安全中心仲搞笑，佢哋話喎，貝類毒素主要喺海產嘅生殖器及消化系統積聚，叫市民進食時除去生殖器同內臟，但「唔保證唔會中毒」，理由係部分中毒個案嘅事主已經除去帶子內臟，結果一樣中招。
咁算點先？呢頭叫人除去帶子內臟，嗰頭又話食其他部位亦唔擔保冇事，唔通食帶子殼先至穩陣？真係九唔搭八，不知所謂。其實解決問題嘅辦法好簡單，只要暫時禁止售賣帶子咪得咯，一了百了，乾手淨腳，使乜講咁多耶穌呀。計功夫茶話齋，港府高官後知後覺，對市民健康麻木不仁，比毒帶子仲可怕。