塞爾特人愈老愈可愛
邊個仲敢話老人家冇料到！「老人院」塞爾特人尋日回師主場，憑皮雅斯大發神威攻入31分及搶下13個籃板，輕鬆以96比84擊敗魔術，總成績4比2淘汰魔術，事隔一季再奪東岸冠軍並率先闖入總決賽！塞軍在季後賽已先後淘汰東岸兩大龍頭騎士及魔術，足證球員愈老愈可愛。
今季塞爾特人最為人讚賞嘅地方，就係心理質素強勁，賽前被魔術連追兩場後，今場亦未見信心動搖，反而球員深明要在今仗止血，打得特別積極。塞軍中鋒柏堅斯賽前打甩技犯，今場續以正選上陣，至於上場腦震盪嘅格連戴維斯及傷背嘅拉舒華萊士，同樣趕及復出。
尼特羅賓遜奇兵突出
塞軍藉主場威勢，首節過後已領先11分，雖然第二節有朗度傷出，迫於無奈要起用尼特羅賓遜，但呢位三屆入樽王卻成為一路奇兵，此節個人攻入13分，助塞軍進一步拋離分數。下半場就輪到雷阿倫發威，連番投入三分球下，三節過後已助塞軍領先21分之多，落後太多嘅魔術最終無力追分，以84比96見負，並以２比４宣告畢業。
皮雅斯繼續成為主角，全場15次起手中９球，罰球10中９，合共攻入31分及搶下13個籃板，佢賽後表示：「我冇一刻諗過領先３比０下會被追番，我知道早前冰球曾發生類似情況，但呢場係籃球賽，或者總有一日會有球隊創造歷史反勝，但慶幸悲劇冇發生喺我哋身上。」
塞爾特人已在今季季後賽接連淘汰騎士及魔術，回復前季最佳狀態，難怪唔少美國傳媒均睇好塞軍可以繼前季後，再一次「Beat LA」，當然首要條件係湖人能夠過關入總決賽。
■本報綜合報道