姚明榮升巨人爹哋

中國籃球巨星姚明榮升做爸爸,老婆葉莉昨日誕下一名七磅六安士嘅重磅女嬰。由於爸爸同媽媽都係絕世「高人」,有醫學專家根據遺傳學公式計算出,「姚千金」長大之後,身高有可能達到2.08米,骨骼精奇簡直係打籃球嘅好材料,可以繼承父母衣鉢。

葉莉喺美國休斯敦一間醫院順產之後,姚明立即透過社交網站發放喜訊,獲得大量球迷及網民祝賀,佢話:「我真係好興奮,今次係我哋夫婦生命中一段特別時刻,我哋非常感謝大家嘅支持同好意。」姚明同葉莉喺○七年八月結婚,並於今年一月傳出葉莉懷有身孕,但佢哋仍未為囡囡起名,似乎等緊球迷畀意見。

而另一NBA中國球員易建聯及姚明好友、香港藝人孫耀威先後在微博向姚明作出祝賀。

遺傳學公式計算

事實上,「姚千金」已成為球迷間熱烈討論話題,例如佢會唔會好似爸爸同媽媽一樣「高人一等」。有醫學專家指,姚明身高2.29米,葉莉身高1.9米,利用遺傳學公式計算,「姚千金」長大後,身高應會介乎1.945米至2.085米之間,可堪稱為超級高妹。因此,一般估計「姚千金」將來好可能成為籃球員。

避談國籍風波

另外,好多中國球迷關注「姚千金」到底會入中國籍,或係美國籍,由於呢個問題極度敏感,姚明都唔敢正面回答,佢只想女兒可以喺一個健康嘅環境長大。因此,火箭隊嘅擁躉認為姚明應會留隊,令囡囡可以過安穩生活。

本報綜合報道