香港近日冒起一個好傷腦筋嘅問題，拆你屋好呢，定係唔拆好？拆，唔拆？唔拆，拆？死咗好多大腦細胞。
好似上環永利街咁吖，本來話要清拆重建，後來出現一套揚威國際嘅《歲月神偷》，由於取景拍攝現場正正係「六十年代最後人文風景線」永利街，當堂引發一連串保育效應。卒之咯喎，市建局突然又話唔拆嘞，原汁原味成條街保留。之不過咁，唔好以為放下屠刀真係可以立地成佛，保育計劃完全倉卒行事急就章，激死好多一心一意等搬屋嘅老街坊，市建局照樣畀人鬧到狗血淋頭。
跟住落嚟，受到土瓜灣馬頭圍道冧樓刺激，再有收購舊樓門檻由九成業權降至八成嘅「強拍條例」。所謂收購舊樓，意思咪又係清拆重建囉，同樣問題重複出現，拆，唔拆？唔拆，拆？
計功夫茶話齋，屋宇署官員應該亦係非常困擾，因為呢個部門由始至終好似傻仔咁，諗唔通拆定係唔拆。即使僭建物投訴數字不斷攀升，屋宇署仍然懵到上心口，目光呆滯不知如何是好。
有一單畸屎係咁嘅。李太喺灣仔擁有一個商廈單位，年前發現單位內牆有滲漏同剝落情況，幾經追查之下，舊年九月得知下層單位平台有僭建物，連同巨型招牌都係非法僭建，李太即刻去屋宇署投訴啦，諗住攞番一個公道，最好當然係一聲令下清拆僭建物。哈，你估屋宇署職員點講呢？佢哋話喎，僭建物存在咗好耐o架喇，冇即時危險，所以不取締。
功夫茶淨係聽過「逆權侵佔」，即係有人住咗某個地方好耐好耐，可以申請成為正式業主，不過從未聽過「逆權僭建」。乜僭建物存在咗好耐就唔使拆o架嗱？真係孤陋寡聞。
畸屎未講完o架。李太後來又發現，僭建招牌竟然出現用以加固嘅鐵鈎以及鋼索，李太再一次知會屋宇署啦，點不知呢次更加谷氣，屋宇署職員話喎，加固僭建物冇問題！
谷氣都係次要，最攞命嘅係李太嘅單位內牆滲漏擴大，擔心樓宇結構受到影響。萬一大吉利是講一句，巨型招牌失驚無神砰磅一嘢跌落街，唔知砸死幾多人。
屋宇署對於僭建物無動於衷，立法會發展事務委員會委員王國興就批評話嘞：「個招牌已經係僭建，加固佢即係新嘅僭建，屋宇署都仲唔肯做嘢，唔係放生就係包庇！」
唉，愈講愈傷腦筋，莫非屋宇署認為殘殘舊舊嘅古老招牌都係香港人珍而重之嘅集體回憶？唔通拒絕清拆僭建物都算係保育工作？又抑或，屋宇署好識得擦鞋，一心諗住將拆招牌嘅豐功偉績留畀曾蔭權？你知啦，煲呔曾講過，拆招牌可以創造好多就業機會，係振興經濟嘅良方妙計，拆招牌嘅神聖任務留畀曾蔭權確係擦鞋擦到立立靚。
點都好啦，既然屋宇署懶得清拆僭建物，功夫茶又要不厭其煩講多次，行街街小心高空墮物呀，最好當然係行騎樓底戴鋼盔！