如果你係工廠大廈業主，忽然之間聽到特區政府話幫你鹹魚翻生搞活化，你會有乜嘢反應呢？計功夫茶話齋，唔使諗，唔使審，唔使眼甘甘，一於加租！
工廠大廈本來十室九空，皆因香港工業死氣沉沉，本地工業家唔係北上經營就係索性執笠，工廈單位供過於求之下，業主一向唔敢獅子開大口加租。家陣好咯，有政府扶一把，推出活化大計，工廈起死回生再有市場價值，唔加租嗰個就係傻仔。
之不過咁，業主就話開心啫，租客肯定叫苦連天。喂，冇咗工業家，仲有藝術家，好多創意文化工作者睇中工廠大廈又平又靚又正，所以老早進駐成為租客，工廈加租嘅直接受害者毫無疑問係藝術家。至於間接受害者咯喎，搞笑夾諷刺，係口口聲聲發展創意產業嘅特區政府。
好似新蒲崗工廠區五芳街一帶咁吖，至少有二十四間創意文化機構，工廠大廈簡直就係小型藝術村。今年年初，成班藝術家組成新蒲崗創意文化產業關注組，訪問過其中十七間創意文化機構嘅負責人，發現所有受訪者都認為活化工廈最大得益者係業主，七成三認為對營運者毫無幫助。關注組包括工聯會副會長陳婉嫻決定約見發展局局長林鄭月娥，要求暫緩執行活化工廈措施，設置租金上限保障，規定活化工廈兩成樓面作為創意產業用途，以低廉租金保障業界生存空間。關注組另外又建議政府成立專項基金，向文化創意團體或者獨立藝術工作者提供補貼。
唔知大家點諗，功夫茶就覺得非常之咁荒誕。點荒誕呢？即係咁，活化工廈本來係一個祝福，點知隨時變咗一個詛咒，官老爺情深款款送上一吻，有機會淪為死亡之吻。
你知啦，藝術家靜靜雞進駐工廠大廈一直相安無事，業主有租收，租客有個竇，互惠互利各取所需。忽然之間，官老爺話喎，咁嘅做法冇規冇矩，唔係幾妥當，不如正正經經推出活化政策納入正軌啦，順便容許業主改變用途，興建酒店都得。於是乎，藝術家大禍臨頭嘞，創意產業慘遭扼殺，事關納入正軌唔代表考慮周詳，官老爺根本冇諗過畀藝術家繼續以廉價租金從事創作。簡單講一句，好心做壞事。
難怪有創意文化工作者好激動咁講，活乜鬼嘢化工廈吖，活化官老爺嘅花崗岩腦袋先啦！
講真，功夫茶幾同意一個陰謀論o架。有人認為，工廈多數位於交通重點或者臨近海邊，價值非常之高，政府活化工廈只係方便財團增加土地儲備，借創意產業為名，實際又係發展地產。
唉，地產地產又係地產，莫非發展局局長嘅正確名稱真係「發展商局長」？林鄭月娥如果唔鍾意呢個陰謀論，反駁方法其實好容易，請以實際行動支持創意產業，而唔係狠狠扼殺！