公還公，私還私，連小學生都知道乜嘢叫公私分明，反而有啲政府官員公私不分，甚至假公濟私，簡直教壞細路，敗壞社會風氣。
呢，機電署又爆醜聞啦，今次又係涉及公車私用，即係又有人假公濟私咁話。公車只能辦公事，私事唔該食自己，政府守則寫得清清楚楚，但有位機電署高級職員懷疑知法犯法，將公車當私家車用，而且一個月內用咗至少七次，連揩油都要揩到夠本。
本報記者上個月跟蹤追擊發現，呢個高級職員多次開工冇幾耐，就施施然去到機電署總部三樓停車場，坐上一架合約車離開。喺呢度，等功夫茶先為大家解釋下乜嘢係合約車。政府工程招標嗰陣會附加條件，要求承判商提供車輛接載政府人員監督工程，機電署員工如果要外出執行公務，可以預約使用合約車。
跟住睇下呢個職員坐車去邊。奇怪噃，點解目的地唔係工地，而係牛頭角一間中醫骨科診所嘅？原來，佢去檢查嘅唔係工程進度，而係自己嘅「病情進度」啫。仲有呀，佢唔係順路兜去，而係專程坐合約車去睇骨科，好明顯係搵阿公着數啦。
合約車同司機喺診所樓下等咗個幾鐘，至接高級職員返回機電署總部。最抵死嘅係，公車私用有埋「更表」添，有人除咗睇醫生外，仲多次接載朋友，「使用率」咁高，唔通真係食得唔好嘥？
其實，機電署對合約車使用有晒指引，無論辦公時間定係非辦公時間，合約車都唔可以用作非公務用途，否則可能面臨被檢控同紀律處分。身為高級職員，濫用合約車，擺明當指引及守則冇到，機電署有法不依，有例唔執行，指引用嚟嚇鬼㗎？
更令人關注嘅係，涉事職員主要負責撰寫同批核政府工程標書、監督承判商嘅進度。今次承判商提供合約車畀佢當私家車用，除咗懷疑假公濟私、浪費公帑之外，仲有冇其他景轟？有冇涉及收受利益？正如有立法會議員批評，問題顯示港府疏於監管。其實，咁點止係疏於監管，簡直係冇監冇管，當局必須交代清楚，咪係咁意「調查」下就算數。
市民擔心今次個案涉及利益衝突，唔係危言聳聽，亦唔係杞人憂天㗎。早喺二○○二年，機電署有個涉及不當使用合約車嘅高級督察，除咗公車私用、容許司機虛報出車時間，呃咗超過三萬蚊超時補水外，更被揭發由外判商支付去歐洲旅行嘅大部分費用，卒之被判監八個月。一件污，兩件穢，冇人敢擔保類似醜聞唔會重演。
話時話，政府內部假公濟私醜聞無日無之，警官坐水警輪去蒲台島開海鮮大食會；食環署職員返工時間用外勤車載行李返屋企；依家又輪到機電署高級職員將合約車當私家車用。千里之堤，潰於蟻穴。計功夫茶話齋，如果當局唔及早整頓吏治，嚴肅法紀，個個有樣學樣，你揩我揩齊齊揩，納稅人交多多稅都唔夠班公務員揩油啦。