長沙灣工廠大廈一場四級大火，又有一位英勇消防員楊俊傑殉職，唉，黯然神傷！
當然啦，消防員工作有一定危險性，如果唔係都唔會咁值得世人尊敬。之不過咁，救火救人啫，唔使一定捨身成仁啩？聽講家陣消防處用嘅係阿爺年代嘅陳舊裝備，更新速度慢到出奇。好心特區政府唔好扮烏龜啦，辦事效率快少少得唔得？人命關天呀，安全第一o架，功夫茶肯定全港市民只係想尊敬消防員，而唔係一次再一次輓敬。
正所謂，預防勝於治療，其實最好嘅救火救人工作係事前做嘅，而唔係事後孔明。就好似今次出事嘅工廠大廈咁吖，如果事前安裝咗自動灑水系統，應該唔會搞到咁大鑊。好可惜，消防處話喎，六十年代落成嘅舊式工廠大廈係冇自動灑水系統嘅，估計現時全港有六百五十幢存在同樣問題。既然係咁，點算好呢？消防處又話嘞，不排除修改法例，重新監管舊式工廠大廈嘅消防安全。
呢嗱嗱嗱，呢啲咪係叫做事後孔明囉。喂，工廠大廈發生沖天大火已經唔係第一次o架啦，單單○七至○九年間，最少發生過六宗工廈火警，其中○七年荃灣一場三級火更加導致消防員黃家熙殉職。問題其實存在咗好耐好耐好鬼死耐，消防處硬係要多一個消防員殉職先至話不排除修改法例，功夫茶有少少擔心浩園呢個英雄塚愈來愈擠迫。
除咗缺乏自動灑水系統之外，舊式工廠大廈普遍有相當嚴重嘅火警危機。本報記者親自巡查過，以大角咀一幢有五十年樓齡嘅工廈為例，危機足足有四處。第一，幾乎所有防煙門都係芝麻開門，閂門防煙嘅作用等於零；第二，梯間擺放大量雜物，萬一走火警必定一仆一碌，通往天台嘅樓梯更加係完全塞死；第三，天台通常係避難所，火燒後欄可以雞咁腳走上天台等候救援，吖，呢個天台竟然改建為工場；第四，最神奇嘅係，大廈其中一層走廊天花板居然出現一個閣仔物體，相信係用嚟放置雜物嘅，一旦火燭，從天而降嘅雜物未必砸得死你，不過阻住你疏散已經死得。
其他工廈嘅問題千奇百怪，滅火筒過期生銹又有，走火通道擺個燒衣拜神用嘅化寶盆又有，化工公司旁邊驚現大量煙頭都有。
好嘞，消防處平時到底有冇巡查嘅呢？記者係咁意已經發現大量僭建，屋宇署又有冇監管嘅呢？其實畫公仔都唔使畫出腸咯，官僚作風就係咁o架啦，聽到扮耳聾，睇到扮眼盲，消防消防，消極防範。
點都好啦，奢望官僚作風一時三刻痛改前非應該冇乜可能o架嘞，功夫茶只係有一個卑微願望，英雄救火唔使餐餐殉職得唔得？