記得招財貓錢罌嗎？舊時幾乎家家戶戶都有一個，不過好多小朋友就唔係好鍾意錢罌啦，因為錢塞入去易，攞出嚟難，永遠有入冇出。
香港政府就好似招財貓錢罌咁，有入冇出，或者入多出少。嗱，新財政預算案對扶貧紓困一啲長遠承擔都冇，淨係小恩小惠派咗一、兩粒糖仔，如果政府真係水緊等錢使，量入為出仲情有可原，但家陣明明庫房水浸，財政儲備已經超過五千億元，足夠政府使二十一個月，點解鬍鬚曾仲好似鐵公雞咁一毛不拔？
唔講唔知，原來當局出蠱惑，三年前已經靜靜雞將儲備水平指標，由相等於十二個月政府開支，調高到所謂「充足」水平，未來五年嘅政府開支都會按呢個指標規劃。
咁都得？乜嘢叫做充足水平呀？維持幾多財政儲備，以前都係睇經濟環境而定，可以應付十二個月政府開支就足夠啦。依家財政儲備夠政府使二十一個月，簡直係超晒額。所謂充足水平，等於港府話幾多就幾多，毫無準則，亦即係話當局可以隨心所欲，喜歡就派粒糖仔，唔喜歡就一毛不拔。有立法會議員批評港府政策多變，缺乏諮詢，更加冇客觀標準，質疑當局「刻意糊塗」，想用呢招嚟拒絕「還富於民」。
話時話，港府一向算死草，有自己着數，冇市民便宜。家陣偷龍轉鳳將儲備水平變成「多多益善無上限」，咁同守財奴又有乜嘢分別呀。港府財政儲備豐厚，正如有人話齋，肥到連襪都着唔落，咁嘅環境都唔肯還富於民，仲要等到幾時？唔通想重施故技，留番啲儲備益自己友，為公務員加人工？
財政儲備唔係政府嘅「私己錢」，而係納稅人嘅血汗錢，人人有份，一定要用得其所，應使就要使。至弊班高官人工一流，財技九流，理財無方，唔該使嘅亂咁使，該使嘅又唔使。香港大把地方等錢使，如果財政儲備運用得當，好多問題就算唔可以徹底解決，都可以大大紓緩啦。例如安老院資助宿位長期供不應求，當局口口聲聲話要改善養老服務，但預算案增撥嗰一億六千萬，只夠增加一千個宿位，簡直就係杯水車薪。其實好簡單，如果儲備留少啲，撥款加多啲，長者輪候宿位就可以快啲，又點會有咁多公公婆婆等唔到宿位就過身吖？
仲有吖，如果增撥多啲資源畀公共醫療系統，病人唔會「有病無錢醫」，前線員工唔使做到踢晒腳，公立醫院嘅服務都可以大大改善啦；如果撥多啲錢增加救護設施，又使乜搞到救護車甩皮甩骨，死火多過食飯呀！
計功夫茶話齋，鬍鬚曾話財政儲備愈多愈好，根本係拒絕扶貧紓困嘅藉口，積穀防饑其實係囤積居奇，等政府可以翹埋雙手，乜都唔使做。量入為出變成只入唔出，擺明搵笨！