未入正題之前，先同大家講講兩項人體器官功能。第一項功能係視覺，正常而言係有「開關裝置」嘅，即係你擘大對眼就係開，瞌埋雙眼就係關，除非你好似相傳嘅三國英雄張飛咁樣，瞓覺覺豬都要睩大對眼。第二項功能係聽覺，耳仔呢個人體器官就蝕章嘞，上帝造人嘅時候忘記咗設計開關。
點解要講視覺同聽覺呢？因為家陣搭巴士好煩，先有電視廣告，再有報站廣告。即係咁，你唔想睇電視廣告咩，你可以選擇擰歪面，甚至瞌埋眼；不幸嘅係，礙於耳仔冇開關，你唔想聽報站廣告都唔得。
巴士報站系統本來都幾好o架，清清楚楚畀乘客知道「下一站係乜乜物物」。哈，巴士公司唔知係咪見錢開眼呢，最近引入廣告贊助，乘客迫於無奈要聽晒成段十幾二十秒嘅冗長錄音先至有報站資訊，例如：「乜乜洗地水，拖地殺菌，乜地板都得，仲有效抗菌四十八小時。乜乜洗地水提提你，下一站係乜乜物物。」
唉，你知啦，香港巴士站之間嘅距離有時係好短㗎咋，報站廣告未講到一半可能已經埋站，對於人生路不熟嘅乘客嚟講絕對係靠害，因為唔知下一站係乜乜物物吖嘛，隨時趕唔切落車。「乜乜洗地水，拖地殺菌，乜地板都得……」弊傢伙，巴士站過鬼咗！
即使你知頭知路完全唔使倚靠報站資訊都識得落車，喂，重重複複嘅廣告錄音煩都煩死啦。功夫茶最近去過一個新開張嘅廣場，來來去去就係播住同一首音樂，過咗幾粒鐘已經煩到想殺人，長時間逗留廣場裏面嘅員工睇怕遲早精神分裂。大家試諗諗，乘客搭車時間就話有限啫，負責開車嘅車長點算？家陣係疲勞轟炸喎，意志力薄弱嘅萬一精神崩潰將架巴士剷上行人路，唔通搵廣告贊助商賠命呀？
所以咯喎，最近不斷有人向相關部門投訴，包括直接向巴士公司詐型，更加有人喺社交網站Facebook開設「強烈反對九巴車廂報站系統加插廣告」群組，網民入組不知幾咁踴躍。網民講得好絕核，佢哋話唔想耳仔慘遭強姦。另外網民又交換心得，盡量避開有報站廣告嘅巴士路線，甚至有人揚言罷搭抗議。
一句講晒，疲勞轟炸離晒譜！
講真，香港已經有太多污染，搭巴士唔好再有廣告污染得唔得？功夫茶有一個朋友，寧願搭巴士都唔肯揸車返工，就係想乘機瞓一瞓。家陣慘嘞，報站廣告嘈喧巴閉，想瞓都冇得瞓。
好心運輸署做下嘢啦，捉巴士公司負責人照照肺，賣廣告都唔好賣到民怨沸騰吖嘛。如果唔係，功夫茶提提你，下一站，乘客鼓譟！