嘩嘩嘩！轉性咯轉性咯！市區重建局終於肯放下屠刀，將上環永利街剔出重建項目，規劃為保育地帶，而且答應以業主身份原汁原味保留舊有面貌！
吖，唔知係咪「永利」兩個字好意頭呢？永利永利，永遠勝利，方興未艾嘅保育運動似乎贏咗一場勝利。對於喺永利街取景拍攝嘅《歲月神偷》電影工作者嚟講，更加係一場喜出望外嘅勝利。夫妻檔羅啟銳同張婉婷仲話，永利街得到保育比電影得獎更高興。
之但係咁，世事往往冇咁美滿嘅，有利自必有弊，話就話保留「六十年代人文風景線」啫，可惜現實依然存在唔少問題。譬如話，雖然好多人非常懷舊，鍾意發思古之幽情，不過喺當地住咗幾十年嘅街坊未必人人都係咁諗，佢哋巴不得市建局早早收購，等佢哋搬去冇咁溶溶爛爛嘅新居吖嘛。
市建局主席張震遠話喎，現時已經收購咗一半業權，以後唔會再積極收購，不過如果有業主希望將名下單位賣畀市建局，佢哋係會考慮嘅。計功夫茶話齋，除非個別業主唔肯賣嘅啫，否則市建局應該好人做到底、送佛送到西，一於成條街買晒佢，保育工作更加名正言順吖嘛。
除咗有部分想賣未賣嘅業主唔係咁高興之外，仲有另一個現實問題。喂，叫得做「六十年代人文風景線」，即係落成半個世紀啦，當地唐樓確實又殘又舊o架喇，保育無疑係好事，最怕保下保下變咗危樓。所以咯喎，麻煩市建局呢個大業主切切實實做好維修工作，冇人想見到土瓜灣馬頭圍道死人冧樓悲劇重演。
唔好怪功夫茶太挑剔，尚有一弊未解決。嗱嗱嗱，原先成個計劃係叫做「士丹頓街／永利街重建項目」嘅，家陣保育永利街，咁士丹頓街點算好？當地街坊嘅利益又點平衡？萬一搞到士丹頓街街坊怒氣沖沖包圍永利街抗議，咁就眼冤咯！
大家唔好以為純粹嘅維修工作好簡單，其實當中大有學問，尤其係維修古舊建築，學問更加博大精深。舉一個例吖，有東歐巴黎之稱嘅捷克首都布拉格，風景靚到冇人有，蜚聲國際嘅查理士橋擁有六百五十年歷史，屬於「十四世紀人文風景線」，古老大橋正在維修，當地民眾醞釀示威。維修好事吖，點解要示威？因為布拉格人不滿維修公司採用新簇簇嘅現代化物料，同古色古香嘅查理士橋格格不入。
即係咁，永利街唐樓維修之後一旦出現三尖八角嘅「後現代野獸派建築風格」，功夫茶第一個帶頭示威！
點都好啦，市建局作為一個「歲月神偷」，放下屠刀等於交還賊贓，望就望佢哋立地成佛，阿彌陀佛！