睇新聞學金句：真的假不了，假的真不了。計功夫茶話齋，新的舊不了，舊的新不了。嗱嗱嗱，唔好誤會有任何影射成分呀，絕對唔係話有人貪新忘舊，家陣講嘅係政府強制拍賣舊樓，舊樓當然新不了啦。
即係咁，發展局局長林鄭月娥推出法律公告，將強制拍賣舊樓嘅門檻由原先嘅九成降至八成，只要有八成小業主肯賣出名下物業，其餘兩成就要迫於無奈「眾望所歸、冇得留低」，接受強制拍賣，跟手自然係地產發展商清拆重建。有關公告雖然惹來不少反對聲音，不過喺立法會分組點票嘅機制之下通過咗，四月一日即刻生效。
強拍舊樓嘅門檻由九變八，好明顯對部分小業主非常之咁唔公平，難怪有人質疑「強搶民產」，甚至乎「官商勾結」。當然啦，林鄭局長誓神劈願矢口否認，仲叫人唔好感性蓋過理性添。
收購舊樓業權從來都係一件麻麻煩煩嘅事，發展商一定會話，喂，你個單位殘殘舊舊，收購價梗係有咁低得咁低㗎啦；小業主例必反駁，喂，你買嚟都係重建嘅啫，新樓落成可以賣到好貴好貴喎，收購價梗係有咁高得咁高㗎啦。一個開天索價，一個落地還錢，好多時候就陷入曠日持久嘅拉鋸戰。
講到呢度，有必要睇番降低強拍門檻嘅理據。前一排土瓜灣馬頭圍道咪死人冧樓嘅，林鄭月娥就話嘞，收購舊樓唔可以一拖再拖，否則隨時又變危樓，所以有必要加快收購速度，要等到集齊九成業權太慢嘞，一於減到八成啦。
關於買賣雙方嘅利益矛盾，姑且唔同你糾纏，功夫茶淨係想問一問局長：既然降低強拍門檻嘅原因係出於慎防冧樓，強拍機制有冇加入安全因素呀？如果冇考慮到安全問題，成個九變八嘅政策係咪九唔搭八呀？
現時官方嘅講法係咁嘅，即使強拍門檻下降至八成，土地審裁處仍然會考慮兩個重要原則，先至決定係咪審批重建。第一個原則係樓宇是否高齡，第二個原則係步驟是否合理。唉，講來講去始終冇提到安全原則。
大佬，舊樓未必一定危險，好似禮賓府咁吖，落成已經百幾年嘞，一直冇穿冇爛老而彌堅，你有冇聽過曾蔭權話驚冧樓驚到瞓唔着吖？所以咯喎，只係考慮樓宇是否高齡唔一定符合安全原則，反而有部分唔係太舊嘅樓，好似政府興建嘅鹹水樓或者短樁樓，落成未夠幾年已經危危乎啦！
所以話啫，反對降低門檻嘅質疑聲音唔係冇道理㗎，你一方面口口聲聲話慎防冧樓，另一方面又冇將安全問題納入強拍機制，咪即係自打嘴巴囉。如果林鄭月娥繼續忽略安全原則，功夫茶應承你，強搶民產論又多一個支持者！