財政預算兜巴星 民望預算冇得升

咳咳……嗱，聽住喇，財政司司長曾俊華未來一年嘅民望將會出現「嚴重赤字」，冇乜希望「扭虧為盈」，除非出現戲劇性「鞠躬盡瘁」，否則財爺受歡迎程度無法谷底反彈。

咦，冇嗱？民望預算案得一個曾俊華咋？曾蔭權呢？唐英年呢？其他司長局長呢？冇辦法，都話全球首創咯，即係試驗性質啦，功夫茶邊得嚟咁多時間招呼咁多高官吖，煲呔曾都寫過一份短到無倫嘅施政報告啦，民望預算案真係得一個曾俊華咋。

好嘞，等功夫茶同大家分析一下鬍鬚曾嘅民望點解會係「赤字預算」。即係咁，根據港大民意調查顯示，市民對曾俊華嘅評分下降三點九分。評分下降已經難睇，更加樣衰嘅係，反對曾俊華出任財政司司長嘅比率瘋狂上升，由百分之八急升至百分之十八，升咗足足一倍有多！

建基於民意調查，所以有民望預算。你話嘞，唔想見到鬍鬚曾做財爺嘅民間聲音急速倍增，民望預算有乜可能會有前途？

唉，其實唔使多費唇舌，大家都明白點解曾俊華愈來愈唔受歡迎。無他嘅，佢嗰份財政預算案寫得差吖嘛，事先張揚唔派糖，即使小恩小惠，受惠嘅都只不過係「綜援人士出雙糧」或者「公屋免租兩個月」，交稅交得最吃力嘅中產階層永遠係被忽略嘅一群。中產固然一肚氣，假如你係高風亮節唔肯伸大手板攞綜援嘅窮人，住嘅又係籠屋而唔係公屋，你連小恩小惠都冇份。至於講到宏圖大計振興經濟，對唔住，財政預算案係冇貨賣嘅。

簡單一句，財爺搞財政，搞到兜巴星，如果唔係，香港人都唔會有咁多怨氣啦。的而且確怨氣大o架，呢頭有示威者潛入禮賓府玩砌字遊戲，砌出「曾蔭權下台」標語，嗰頭又有抗爭者包圍特首替工唐英年，有人怒掟波鞋，有人瞓街攔路。

講開又講，失業男子怒掟波鞋嗰一日啱啱係傳統打小人嘅驚蟄，而手起鞋落打小人又係怨氣指標。唐唐突然變咗「波鞋底下一小人」，你話嘞，今時今日嘅香港係咪怨過深閨怨婦？

所以咯喎，民望預算案實食冇黐牙，曾俊華嘅支持率一定係「嚴重赤字」。

講到呢度，係時候講講乜嘢叫做「鞠躬盡瘁」。你知啦，鬍鬚曾試過心臟病發入院急救，隨即民望反彈，因為市民可憐佢棉乾絮濕捱到病，博得唔少同情分。問題係，你冇理由要求曾俊華再整多一劑心臟病發促使民望「扭虧為盈」o架，於心何忍呀！