呢次大大鑊！今勻大大煲！廣東近日又爆發大規模豬瘟！病豬死豬隨時食死人！
咦，咪住先，功夫茶有冇神經過敏呀？事關豬瘟呢家嘢非常嚴重，如果真有其事，內地政府冇理由唔公布喎。
當然唔係神經過敏啦，因為本報記者從內地豬農得到第一手資料，好多豬場懷疑爆發口蹄症，豬隻大量死亡，未死都病到五顏六色，部分鄉鎮死豬率甚至高達九成。
廣東各地湧現死豬病豬本來已經夠晒恐怖，更加得人驚嘅係，無良奸商完全唔將人民健康放在眼內，一於賤價收購豬肉再轉售圖利。你知啦，冇病冇痛嘅生豬就話唔怕食落肚啫，家陣豬隻非死即病，難免全身都係惡菌，仲未計為豬隻注射嘅針藥，食落肚容乜易病從口入㗎！
唉，如果你問點解內地政府唔公布豬瘟嘅消息，功夫茶惟有咁樣講，中國係一個完美嘅國家，所以從來只會有好事，永遠唔會有壞事。四川地震災區有冇豆腐渣工程呀？梗係冇啦。海南省有冇輸出農藥超標嘅毒菜呀？梗係冇啦。海南省唔止冇輸出毒菜，如果有其他兄弟單位例如武漢農業部門揭發真相，當地官老爺仲會面斥不雅，掉轉槍頭批評兄弟單位「太不夠朋友」。
所以咯喎，內地政府係冇可能公布豬瘟消息嘅，因為凡事隱瞞係中國官場嘅金科玉律。
好嘞，講番豬瘟，無良奸商賤價收購病豬死豬轉售圖利，後果確係可大可小，莫講話內地同胞危機重重，身為香港人同樣驚到鼻哥窿冇肉。喂，香港街市賣嘅豬肉十居其九係國貨，食到個個腸穿肚爛咁點算？
講到呢度，功夫茶不得不約個時間邀請食衞局局長周一嶽飲杯茶，順便鑑貌辨色望聞問切，睇睇周局長有冇乜嘢頭暈身。冇辦法，周一嶽坐緊嗰個官位太重要嘞，重要到關乎全港七百萬市民人身安全，只要食衞局防疫再次失職，內地豬瘟隨時攻陷香港。
大家可能會問，周局長當然重要啦，一旦失職真係死得人多，之但係，因乜事幹要睇睇佢有冇乜嘢頭暈身？哦，冇嘅，原因係回歸近十三年來，香港嘅防疫戰線幾乎餐餐失守，沙士失守啦，禽流感失守啦，豬流感失守啦，所以功夫茶思疑特區官場其實一早就已經發瘟，發嘅係官瘟。如果周一嶽出現發官瘟徵狀，功夫茶希望將病人送去隔離病房咁解啫。
等一等，咪住先，記者回報，內地有大量死豬屍體胡亂棄置大小河道，腐屍發出惡臭非常難頂。咁就弊弊弊弊弊，只要稍稍有常識嘅人都知道，腐屍係病毒溫床，一個唔覺意又會造成瘟疫蔓延。
點都好啦，一句到尾，拜託周一嶽千祈唔好發官瘟，防疫真係要好好把關，最好梗係主動出擊查清查楚。放心喎，周局長，調查豬瘟真相暫時應該唔會等同洩露國家機密拉去坐監喎。