好嘢！又過節！
大家一定會問，咦，過乜節？三月嘅日曆除咗星期日之外明明冇一日紅色，即係冇公眾假期啦，何來過節？
過節唔一定放假嘅，鬼節都冇假放啦。大家有所不知嘞，今日星期一雖然人人都要返工，不過的而且確係一個節日，因為聯合國將每年三月二十二日定為「世界水日」，你可以當做「水節」。
之所以會有世界水日，原因係咁嘅，聯合國早於一九七七年向全世界發出嚴正警告，水資源係繼石油危機之後下一個迫在眉睫嘅危機，所以一九九三年就確定三月二十二日係世界水日。聯合國嘅目的係解決日益嚴峻嘅缺水問題，開展廣泛宣傳提高公眾對開發以及保護水資源嘅認識。
唔講大家可能唔知，估計全球每年死於同水有關嘅疾病，例如血吸蟲病或者腸蟲感染，人數以百萬計。簡而言之，缺水未必直接將人渴死，不過缺乏乾淨食水就會導致百病纏身。以中國為例吖，每年污水排放量達到五百幾億噸，其中工業污水排放量佔咗一半。水源污染之下，全國三億幾農村人口嘅食水未達到安全標準。
更加慘情嘅係，中國西南部省市最近出現百年來最嚴重嘅旱災，貴州、雲南、重慶、四川、廣西等地乾到土地龜裂，超過五千萬人受災。國家領導人再一次風塵僕僕走去視察災情，苦口婆心勉勵災民「老天難不倒人，困難總會過去」。
唉，本來過節係應該開開心心嘅，之但係一提到水節，即刻令人愁眉深鎖。咁又真係冇辦法喎，你知啦，香港係一個日日浪費珍貴食水嘅國際大都會，而浪費得最恐怖嘅竟然係水務署！
呢嗱，口講無憑，睇睇數據——
首先，唔知係因為水務署懶到出汁定係點，全香港唔係所有地區都鋪設鹹水沖廁系統，好似港島南區、屯門、元朗、西貢同埋離島咁吖，竟然迫於無奈用淡水沖廁，受影響人數多達一百三十萬，每年有八千二百萬立方米淡水就咁沖落鹹水海。
其次，由水務署負責管理維修嘅水管殘殘舊舊日漏夜漏，每年漏水量超過兩成，合計二億立方米，涉及金額七億。老友，渴時一滴如甘露，你試下畀飽受旱災煎熬嘅五千萬內地同胞知道你每年漏水二億立方米吖，唔剷你剷到天花板就奇！
再者，呢條數冇得計，香港最興爆水管，呢頭爆完嗰頭爆，尋日爆完今日爆。爆水管浪費幾多食水真係冇人知，總之一句講晒：水務署敗家！
即係咁，漠視水管漏呀漏，世界水日愁上愁。計功夫茶話齋，水務署唔好再咁敗家嘞，唔該切切實實做好防漏工作，否則水源乾涸到自身難保嘅國家領導人睇唔過眼，一聲令下「樓上閂水喉」切斷東江水供應，到時唔知點收科！