得閒唱下歌，醒神又降火。等功夫茶清清喉嚨唱番隻歌仔先：做隻貓，做隻狗，不做情人，做隻寵物至少可愛迷人，和你不瞅不睬最終只會成為敵人……
因乜事幹咁好唱口？哦，冇嘅，因為見到兩單新聞，分開嚟睇已經騎呢，夾埋嚟睇更加搞嘢，睇完唔到你唔慨嘆一句，唉，人不如貓狗呀！
先睇第一單吖。有一位五十六歲馬女士忽然肚痛，家人急急腳送佢去屯門醫院急症室啦。點不知，急驚風遇着慢郎中，屯門醫院急症室原來係慢條斯理龜速行事嘅，馬女士痛到典床典席嗌晒救命，醫生淨係幫佢打咗一支止痛針咁大把，跟住撇低佢唔理。前前後後拖咗兩粒幾三粒鐘，馬女士痛到反晒白眼又抽筋，先至有醫生急救。好不幸，救得太遲，返魂無術，病人不治，馬女士死咗都唔知乜嘢事。
馬女士嘅乖乖女係咁講嘅：「阿媽身體好好，未入過急症室，但入一次就冇命！」因為懷疑係延誤救治，所以一定會追究到底。
再睇第二單吖。醫院管理局轄下律敦治以及鄧肇堅醫院急症科訓練中心，舊年十二月同美國嘅寵物急救培訓機構合辦寵物急救證書課程，大受歡迎，堂堂爆滿，聽講家陣報讀要到八月先至有位。課程教授貓狗心肺復甦法、包紮同埋骨折處理等等，提供貓狗模型，模擬寵物受傷，講真，確係幾專業㗎。
好嘞，睇完兩單新聞，大家有乜嘢感想冇呀？即係咁，愛護動物本來係好事，救貓救狗功德無量，問題係，喂，公立醫院連人類都未救得切，以公帑營運嘅公立醫院居然不務正業，走去開辦寵物急救班，點解唔留番啲資源救人呀？好似馬女士咁吖，九成就係因為屯門醫院人手不足，所以先至誤墮枉死城啫。
嗱嗱嗱，呢家嘢就叫做本末倒置嘞。醫管局理論上係要救人嘅，但係唔知黐咗邊條筋，喺資源緊絀嘅情況之下居然騰出寶貴人手去救貓救狗。所以話啫，確係要唱歌仔㗎，不過歌詞要稍稍改一改：做隻貓，做隻狗，不做病人！
立法會議員王國興講得啱：「醫管局依家係咪無嘢做先？好多醫療服務都唔夠，好多病人等住救！就算要搞寵物急救班，都應該由漁護署或者愛護動物協會搞啦！」
佛洛伊德心理學有一個好出名嘅理論叫做slip of the tongue，通常譯做說漏嘴，比較傳神嘅講法係鬼拍後尾枕。計功夫茶話齋，公立醫院開辦寵物急救班，應該都係鬼拍後尾枕嘅行為，洩露醫管局嘅本來真面目，唔係醫者父母心，而係醫者獸醫心。因為係獸醫心，所以救貓救狗不救人！
好悲哀哩？好無奈哩？嚟啦，苦中作樂唱歌仔：做隻貓，做隻狗，不做病人，做隻寵物至少可愛迷人，和你不瞅不睬最終只會成為敵人……