魔術大炒巫師29分
魔術同巫師係今季兩支最遲登場嘅NBA球隊，兩軍尋日就喺魔術新場館安利中心展開新季。巫師雖有今季「新秀狀元」約翰禾爾及「太空易」易建聯壓陣，但上季東岸亞軍魔術明顯技高一籌，結果上半場已大幅領先24分，最終以112比83輕取對手，用贏波來賀球場「開張」！
阿聯做第六人唔突出
易建聯尋日首度為巫師喺正式賽事上陣，但就只能充當第六人，要去到首節尾段先登場。阿聯今場合共上陣28分鐘，6投2中貢獻6分，另搶下5個籃板及1記偷波，表現未算突出。巫師今場明顯技不如人，喺杜域侯活及卡達帶領下，魔術首節已領先14分，第二節再添10分優勢，早早鎖定勝局最終大勝29分！
「魔獸」杜域侯活與「飛人」卡達均有上佳演出，「魔獸」9次起手中7球入23分，另交出10個籃板及3次封阻，至於「飛人」就12投8中貢獻18分，兩大主力都未有受季初影響。至於後備兵波蘭球員哥達，賽後就對傳媒瘋狂報道熱火嘅消息略有微言：「每個鐘頭都聽住熱火三巨頭有幾勁、佢哋會點樣破盡紀錄……我已經感到好煩厭，就算返回波蘭，傳媒依然照樣問我對熱火嘅意見，真係夠啦！」
禾爾首戰輸得最甘狀元
另方面，今場亦係新狀元爺約翰禾爾首度登場，雖然佢表現唔差有14分進帳，但因巫師慘負29分，約翰禾爾就無辜成為NBA史上首戰輸得最甘嘅新秀狀元，第二位係奧登喺08年時輸20分。
本報綜合報道