無人駕駛必撞車　離岸施政實撞板

大家唔好話功夫茶以小人之心度君子之腹，公幹外訪演變成政治醜聞嘅例子真係好多㗎。記唔記得前任平機會主席王見秋？記唔記得另一位前任平機會主席鄧爾邦？記唔記得前任副私隱專員林永康？一個二個就係衰喺「公帑遊埠」之上。所以咯喎，當你見到問責高官又係走走趯趯，你又會懷疑係咪浪費公帑。

數據顯示，原來香港特別多「離岸高官」，公幹外訪次數之頻繁簡直嚇死人，一係勤力到傻，一係偷懶到癲。由去年七月至今年七月，前前後後十三個月之間，三司十二局問責高官因公務離港總共五百零二日，仲未計以私人理由離開香港或者正常休假嘅日子。出訪海外日數最多嘅係財經事務及庫務局局長陳家強，十三個月外訪十五次，共計五十九日，外訪目的包括出席大型會議、展覽以及典禮等等，最長一次行程離港長達八日。

嗱，大家計計數，十三個月外訪十五次，即係平均每個月出訪多過一次，外號傻強嘅陳家強睇怕真係傻傻地，邊有人做局長做到好似空姐咁㗎！

至於三名司長咯喎，政務司司長唐英年離港最頻密，合共出訪二十一次五十八天，最長一次行程七日。日數雖然少過傻強，不過唐唐走趯次數更加得人驚，平均每個月出訪幾乎兩次，邊有人做司長做到好似冇腳嘅雀仔咁㗎！

司長局長向左走、向右走變成「離岸高官」，官樣文章當然係話替香港爭取利益啦。可惜吖，高官「不在其位」太多，加上署任制度混亂，難免影響政府運作，甚至乎拖垮施政。

唉，講到署任制度混亂，呢家嘢先至恐怖。局長唔見咗，邊個頂硬上？順理成章當然就係副局長署任局長，問題係，係人都知全班副局長加上政治助理表現差到冇朋友，每個月合共白高薪三百萬，交出嘅成績就貨不對辦。

最好笑係副局政助個個好似隱形人，認知度統統接近零。港大民意研究計劃先後做過七次調查，十八條友仔之中只有五人錄得認知度，不過最高都係百分之五咁大把，後來港大決定停止調查，因為再調查落去都係冇意義。另外，自由黨又做過調查，顯示副局政助表現差劣，大部分市民拒絕收貨，建議政府考慮換人。

可惡嘅係，政府最近公布薪酬中期檢討報告，居然評定十八名副局政助「整體表現合乎要求」，一律維持薪酬不變。唔使減薪，只係凍薪，呢個所謂薪酬檢討又係另一次赤裸裸官官相衞。

總之，計功夫茶話齋，無人駕駛實撞車，離岸施政實撞板，小心又搞出政治醜聞呀！