今年七月好似話係難得一見嘅「藍天白雲月」，雖然熱到跳舞，不過天朗氣清。天文台話喎，今年七月罕有地整個月冇一日空氣污染指數達到偏高水平，係十一年以來最好嘅。
失蹤已久嘅藍天白雲忽然浪子回頭，係咪特區政府發功嘅成績？係咪環境局嘅環保政策終於收效？當然唔係啦，首先，天文台估計好天氣可能同西北風以及熱帶氣旋影響較弱有關；其次，環保團體認為香港採用嘅空氣質素指標十分過時，未必反映真實情況。即係話，一係大話夾好彩天公作美，一係數據帶有泡沫成分，總之就同環保政策無關。
講到環保政策，莫講話無關天朗氣清吖，有時候更加可以激死你。政府三年前咪推出環保車稅務優惠計劃嘅，至今寬免超過一萬三千輛環保車首次登記稅，少收三億四千幾萬元稅款。表面上呢一項政策都算造福地球，稅務有得優惠咯喎，吸引更多人使用環保車，廢氣噴少啲，空氣清新啲。之不過滑稽嘅係，環保團體綠色和平踢爆，得到稅務優惠嘅三十九款所謂環保車之中，大部分其實並不環保，七成車款每公里嘅二氧化碳排放量，超出歐洲國家三年前制訂嘅新車排放平均值，不但無助減少溫室氣體，甚至有誤導市民之嫌。
更加荒謬嘅係為老不尊、教壞子孫，原來特首暨同一眾高官其身不正，名義上用嘅係環保車，實際上不斷隨街放毒屁！
英國○七年制訂嘅新車平均二氧化碳排放量係每公里一百五十八克，特首用嘅一款「凌志」排放量高達二百零五克，而三位司長使用嘅「福士」，排放量甚至高達二百九十三克。綠色和平計過數，以香港私家車平均每年行駛一萬二千五百公里計算，特首以及三位司長嘅座駕每年就產生十三噸二氧化碳，至少要種植六千棵樹先至能夠中和呢四架車噴出嚟污染空氣嘅毒屁。
唉，你話吖，係咪激到你嘔白泡？所以綠色和平項目主任古偉牧就批評嘞，當年訂立嘅環保車準則無視汽車碳排放量，僅以燃油效率作篩選標準，導致碳排放較高嘅私家車亦都享有稅務優惠。古偉牧仲話：「政府話呢啲係環保車，簡直係誤導，跣市民一鑊！」
計功夫茶話齋，唔止跣一鑊，簡直摑一巴，摑到你好似法官姪女襲警案嘅受害人咁樣暈陀陀。點解咁講呢？事關綠色和平今年五月發動通緝氣候逃犯行動，圍繞中環政府總部抗議環保不力，又喺地面塗上「救氣候、擒逃犯」標語。哈，氣候逃犯不但唔認衰，反而鐵石心腸起訴九名請願人士，控告佢哋刑事毀壞喎。請願人士無非都係不滿政府救地球失職啫，咁都話要拉要鎖，呢啲咪叫做惡人先告狀囉。
照咁樣睇，今年天朗氣清嘅七月只係曇花一現，氣候逃犯日日坐住環保官車放毒屁，激你唔死臭死你！